Premer-mınıstr Álıhan Smaıylov ortalyq memlekettik organdar, Bas prokýratýra, QMA, BQDA jáne basqa da vedomstvolar basshylarynyń qatysýymen Ekonomıkany demonopolızasııalaý jónindegi komıssııanyń kezekti otyrysyn ótkizdi. Otyrys barysynda komıssııa Rıdder qalasyndaǵy JEO-nyń aınalasynda qalyptasyp otyrǵan jaǵdaıdy qarastyrdy, dep habarlaıdy Egemen.kz Úkimettiń baspasóz qyzmetine silteme jasap.
Energetıka mınıstri Almasadam Sátqalıev ótken jyldyń qazan aıynan bastap stansada birqatar apat oryn alyp, sonyń kesirinen qala turǵyndaryn jylýmen jáne elektrmen jabdyqtaýda irkilister bolǵanyn eske saldy. JEO-nyń burynǵy ıeleri ony jańǵyrtý jáne kúrdeli jóndeý jumystaryna ınvestısııa salmaǵandyqtan, stansanyń tehnıkalyq jaıy ábden tozyp bitýge aınalǵan.
Bıyl Úkimet rezervinen jáne oblys ákimdiginen bólingen qarajat esebinen stansanyń barlyq 6 qazandyǵyna jóndeý jumystary júrgizilip jatyr. Qazir 3 qazandyq boıynsha iske qosý jumystary júrip jatyr, taǵy 3 qazandyqty jóndeýdi jyl sońyna deıin aıaqtaý josparlanyp otyr.
JEO-nyń jańa menshik ıesimen júrgizilgen kelissózder qorytyndysy boıynsha ınvestor kásiporynnyń barlyq qaryzyn ótep, stansany ákimdiktiń kommýnaldyq menshigine beredi degen ýaǵdalastyqqa qol jetkizildi.
Premer-mınıstr JEO-ny jergilikti atqarýshy organdardyń balansyna qabyldaý úshin barlyq qajetti uıymdastarý-quqyqtyq jumystardy júrgizýdi tapsyrdy.