«Qazaq tili» qoǵamynyń Almaty qalalyq fılıaly men «Qazaq gazetteri» JShS quramyndaǵy «Ana tili» respýblıkalyq gazeti oqyrmandar arasynda «Ana tilimizdi ardaqtaıyq!» atty beınerolık baıqaýyn uıymdastyrǵan bolatyn. Dostyq úıinde baıqaý jeńimpazdaryn marapattaý rásimi ótti.
Oqyrmandy memlekettik tildiń mártebesin kóterý jáne nasıhattaýdy jańa tehnologııa men trendter arqyly júzege asyrýǵa shaqyratyn baıqaýǵa 50 shaqty jumys tústi. Professor Káken Kamzın bastaǵan qazylar alqasynyń sheshimimen I oryn – Jambyl oblysynan baq synaǵan Qasymhan Tólendıevke, II oryn – qyzylordalyq Saǵıra Ýálıge, al úshinshi oryn mańǵystaýlyq oqyrman Rysgúl Ramazanovaǵa buıyrdy.
«Keıbir oqyrmandar baıqaý formatyn durys túsinbegendikten, jaramaı qalǵan jumystar da boldy. Jaqsy rolıkter de barshylyq. Qazylar alqasy olardy iriktep, ishinen 3 jeńimpazdy anyqtady. Olar gazetimizge shyqqan maqalalar týraly saraptamalyq vıdeokontent jasap, sol arqyly jeńiske jetti», deıdi «Ana tili» gazetiniń bas redaktory Erlan Júnis.
– Qazaq tiline, ultqa, ult bolashaǵyna qyzmet etý – barshamyzdyń ortaq paryzymyz. Qazirgi «myltyqsyz maıdan» zamanynda til máselesi mańyzdy bolyp tur. Ana tili bárimizge ortaq, til óshse, ult óshedi. Sony umytpaýymyz kerek. Osy maqsatta 1989 jyldan beri «Qazaq tili» qoǵamynyń ystyq-sýyǵyna tózip júrgen azamattar jeterlik. «Ana tili» gazetiniń oqyrmandary kóbeıse, qazaq tiline, ulttyq sana-sezimge, ıdeologııaǵa degen kózqaras oıanatyn shyǵar degen oımen baıqaýdy ótkizdik. Gazet, kitap oqýǵa degen qyzyǵýshylyq báseńdegen zamanda oqyrman tartý, oqýǵa degen qyzyǵýshylyqty oıatý úshin jasalyp otyrǵan is-shara óz jemisin beredi, – deıdi baıqaýǵa demeýshilik tanytqan Halyqaralyq «Qazaq tili» qoǵamy Almaty qalasy fılıalynyń tóraǵasy Qusman Shalabaev.
ALMATY