Prezıdent Qasym-Jomart Toqaev Digital Bridge forýmynda jasaǵan baıandamasynda ınnovasııa men tehnologııalyq progrestiń eń mańyzdy qozǵaýshy kúshi sanalatyn venchýrlyq kapıtal naryǵyn damytý qajettigin tapsyrdy, dep habarlaıdy Egemen.kz Aqordanyń baspasóz qyzmetine silteme jasap.
«Innovasııanyń jáne tehnologııalyq progrestiń eń mańyzdy qozǵaýshy kúshi retinde venchýrlyq kapıtal naryǵyn damytýymyz kerek. Qazaqstan startaptarǵa ınvestısııa salýdy yntalandyrý úshin ınstıtýttyq jáne zańnamalyq bazany dáıekti túrde jetildirip keledi. Byltyr venchýrlyq kelisimderdiń ortasha mólsheri eki ese artty. Bul – qýantarlyq jaıt. Osy oraıda atalǵan salany retteıtin normatıvtik-quqyqtyq aktiler bazasyn AQSh, Sıngapýr jáne Gonkong elderinde qoldanylatyn úzdik tájirıbemen sáıkestendirý qajet», degen Memleket basshysy venchýrlyq kapıtal naryǵyn qalyptastyryp, damytýǵa halyqaralyq oıynshylardy tartý qajettigin de eskertti.
«Qazir jasandy ıntellekt óte qarqyndy damyp jatyr. Sonyń arqasynda ınklıýzıvti jáne turaqty damýǵa arnalǵan tyń múmkindikter paıda bolýda. Bul salada jahandyq báseke óte joǵary. Qazaqstan osy úrdisten tys qalmaýy kerek. Bul – zaman talaby. Sondyqtan biz qazir ozyq tehnologııany damytýǵa aıryqsha nazar aýdaryp otyrmyz. Qazirgi mindet – elimizdegi IT-mamandardyń, sarapshylardyń, ǵalymdardyń basyn qosyp, olardyń kúsh-jigerin tıimdi paıdalaný. Sondaı-aq halyqaralyq seriktesterdiń zor múmkindikterin elimizdiń kádesine jaratý. Taǵy bir mańyzdy máselege nazar aýdarǵan jón. Búginde adamnyń aqyl-oıynan mashına, ıaǵnı tehnologııa ústem bolatyn zaman ornyǵýda. Basqasha aıtqanda, jasandy ıntellekt tehnologııasy adamzatqa qaýip-qater tóndirýi múmkin. Munyń arty nege ákep soqtyratyny belgisiz. Ǵalymdar arasynda buǵan qatysty ortaq paıym joq. Iаǵnı, jasandy ıntellekt adamzatqa ıgilik ákele me álde qurdymǵa ketire me degen suraq áli de ózekti bolyp tur. Sondyqtan osy máselege sanaly túrde qarap, jasandy ıntellektiniń damýyn jiti nazarda ustaý – asa mańyzdy mindet. Mysaly, kezinde atom energetıkasymen qatar atom qarýy paıda boldy. Sol kezde jahandyq qaýipsizdikti saqtaý úshin jańa qaǵıdattar qalyptasty. Bul – tehnologııalyq damý zamanynda ujymdyq qaýipsizdik máselesi baqylaýda bolýy kerek degen sóz» dedi Q.Toqaev.