Qazir álemdik naryqta Qytaıdyń úlesi jyldam ósip keledi. Jańa ozyq tehnologııalardy, jasandy ıntellektini jáne zamanaýı noý-haýlardy paıdalanyp, ınvestısııalyq tyń bastamalardy qolǵa alyp jatyr. Osy salalarda kásibin sátti júrgizip, joǵary jetistikke jetken ózim tanıtyn qandastarymyz da bar.
Sheteldegi bıznesin Qazaqstanda keńeıtýdi kózdegen nemese qajetti kásip boıynsha mamandyǵy bar etnostyq qazaqtarǵa arnalǵan «Ata joly» kartasyn 10 jylǵa deıin berý jumystary jaqynda ǵana bastaldy. Osy rette «Ata joly» kartasynyń múmkindikterin keńeıtý kerek dep esepteımin. Sheteldik ınvestor retinde usynylǵan múmkindikterden tys, qandastarǵa erekshe jeńildikter qarastyrýdy usynamyn. Taǵy da bir aıtatyn másele, tek kásip ashsaq qana «Ata joly» kartasyn beremiz demeı, shetelde kásibi bar barlyq qazaqqa berý kerek. Olar osy mezgil ishinde atajurtqa erkin kelip-ketip júrip, kásibin ashady dep senemin.
Bıyl qyrkúıek aıynyń basynda Almaty qalasynda Qazaqstan men Qytaı arasyndaǵy saýda-ekonomıkalyq yntymaqtastyq forýmy ótti. Forýmda Qazaqstan, Ortalyq Azııa jáne Qytaı Halyq Respýblıkasy kásipkerleriniń bastamasymen «Ortalyq Azııa jáne Qytaı kásipkerleriniń qaýymdastyǵy» quryldy. Men sol qaýymdastyqtyń turaqty hatshysy laýazymyna saılandym. Osy oraıda aıta ketetini, bul máseleden ózge qandastar da shet qalmaý kerek. Qytaıda turatyn aǵaıyndar jáne Qazaqstanǵa kóship kelgen qandastar, barlyǵy da atsalysý kerek dep esepteımin. Sebebi birinshiden olar til biledi. Ekinshiden, ózderi turyp jatqan eldiń ekonomıkasynyń qaı salasy jaqsy damyp kele jatyr? Qandaı jańa tehnologııany qoldanǵanda joǵary ónim alýǵa bolady? Sony jaqsy biledi. Ári ózderi de paıda tabady. Osydan keıin til úırený, mádenıet, sport, taǵy da basqa salalarda dıasporanyń ishki qajettilikterin qarjylandyrýǵa, basqa da demeýshilik jumystaryn uıymdastyrýǵa múmkindikteri bolady. Qaı elde ómir súrsek te sol eldiń Qazaqstanmen áriptestik qarym-qatynasyn damytýǵa, saýda isin jaqsartýǵa atsalysaıyq. Eki eldiń arasynda altyn kópir bolýǵa tyrysaıyq.
О́rkesh SLAMBOL,
«UWEE GROUP» kompanııasynyń
Ortalyq Azııa boıynsha basqarma tóraǵasy