Belarýs Qarýly Kúshteri Arnaıy operasııalar kúshteri qolbasshysynyń júldesine armııalyq qoıan-qoltyq urystan 11-shi ashyq chempıonat ótti, dep habarlaıdy Egemen.kz QR Qorǵanys vedomstvosyna silteme jasap.
16 komandadan 112 sportshy qatysqan áskerı qyzmetshiler arasyndaǵy jekpe-jekter jeti salmaq dárejesinde ótti.
Qorǵanys mınıstrligine qarasty Sport komıtetiniń tóraǵasy – Ortalyq sport klýbynyń bastyǵy podpolkovnık Arman Ábeýovtiń aıtýynsha, áskerı qyzmetshilerdiń kúsh-qýaty men erik-jigerin jáne tózimdiligin damytýdyń tıimdi ádisi sanalatyn armııalyq qoıan-qoltyq urys sportynyń jyldan-jylǵa tanymaldylyǵy artyp keledi.
Chempıonatta Qazaqstan sportshylary serjant Aıdyn Nurıdınov, kishi serjant Oljas Erjan, kapıtan Vadım Fedoseev ózderiniń salmaqtary boıynsha jeńiske jetti. Leıtenant Arman Ermenbet ekinshi oryn enshiledi.
Jarys qorytyndysy boıynsha Qazaqstan Qarýly Kúshteri quramasy jalpykomandalyq esepte birinshi oryn aldy.