Balasynyń oryssha shúldirlep bara jatqanyna alańdaǵan ata-analar balasyn qazaqtildi balabaqshaǵa bergenimen nátıje bolmaı tur. Áriptesimiz Aıdana Shotbaıqyzy osy bir ótkir máseleni «Balamdy qazaqshaǵa bil dep berdim» atty maqalasynda kóteripti.
Avtor balasyn qazaqtildi balabaqshaǵa berip, biraq balasy onda kerisinshe oryssha shúldirlep ketken mysaldy keltirgen. Qazaq tobyna baratyn 25 balanyń ekeýi ǵana qazaqsha sóıleıdi eken. Qazaq tobyndaǵy oryssha sóıleıtin 23 tárbıelenýshiniń ata-anasy balalaryn qazaqshaǵa bilsin dep beripti. Al olar qazaqsha biletin balalardy «búldirip» júr.
Maqalada Oqý-aǵartý mınıstri Ǵanı Beısembaevtyń memlekettik balabaqshalardyń qazaq tilinde bolýy qadaǵalanyp jatqany týraly aıtqan sózi keltirilgen. Sol sózinde vedomstvo basshysy Ǵ.Beısembaev: «2022 jyldan bastap memlekettik balabaqshalardyń qazaq tilinde bolýy qadaǵalanyp otyr. Deı turǵanmen, tili orys tilinde shyqqan balalardyń da beıimdelý kezeńinen ótýine baılanysty qazir mamandar jumys istep jatyr. Ádistemelik dúnıelerdi engizý arqyly biz bul balalarǵa da tıisti kómek kórsetýdi qolǵa alyp jatyrmyz. Sondyqtan bul másele de óz sheshimin tabady degen oıdamyn», degen.
Osy oraıda avtor mınıstr aıtqan ádistemelik dúnıeler jaıynda Oqý-aǵartý mınıstrligine qarasty Balalardy erte damytý ınstıtýtynyń dırektory Manar Adamovadan surap kórgen. Ol: «Respýblıka boıynsha taza qazaq tilinde bilim beretin balabaqshalardyń úlesi 70 paıyzǵa jýyqtaıdy. Tildik ortany qalyptastyrý men qazaq tiline basymdyq berýge baǵyttalǵan «Tilge boılaý» dep atalatyn qazaq tiliniń baǵdarlamasy bar. Osy baǵdarlamany ázirlep, synaqtan ótkizgen Nazarbaev zııatkerlik mektebiniń ókilderi mınıstrlikte jalpy balabaqshalar men mektepterge engizýdi usyndy. Bul baǵdarlamany júıeli engizý úshin pedagogterdi daıarlaý kerek. Oǵan qosa, bilim berý uıymyndaǵy árbir qabyrǵa, kabınet, bólme men dálizge deıin qazaqsha «sóılep» turýǵa tıis. Birden engizý qıyndaý, sol sebepti kezeń-kezeńimen engizý josparlanǵan», dep jaýap beripti.