Aqmola oblysynyń 21 jastaǵy turǵyny esirtki zerthanasyn uıymdastyrdy degen kúdikpen ustaldy, dep habarlaıdy Egemen.kz Ishki ister mınıstrliginiń baspasóz qyzmetine silteme jasap.
«Aqmola oblysynyń esirtki qylmysyna qarsy is-qımyl basqarmasynyń qyzmetkerleri «Qarasora – 2023» respýblıkalyq jedel aldyn alý is-sharasy aıasynda arnaıy operasııa júrgizý barysynda Býrabaı aýdanynyń aýmaǵynda sıntetıkalyq esirtki daıyndaý boıynsha esirtki zerthanasyn anyqtap, joıdy. Jedel ýákilder zerthanany aýdan ortalyǵyna irgeles aýyldardyń birinde úı satyp alyp, óz óndirisin jasaǵan 21 jastaǵy jergilikti turǵyn uıymdastyrǵanyn anyqtady. Esirtki zerthanasynyń orny boıynsha ruqsat etilmegen tintý is-sharalary barysynda esirtki quraldaryn, 430 lıtr prekýrsordy daıyndaýǵa arnalǵan jabdyq, sondaı-aq salmaǵy 755,88 gramm a-PVP psıhotroptyq zat tárkilendi, olar aýdan aýmaǵyndaǵy jasyryn oryndardan alyndy», dep jazylǵan habarlamada.
Kúdikti úıli-barandy, bir balasy bar. Áıeli kúıeýiniń jasyryn zerthanada esirtki óndirýmen shuǵyldanatynyn bilmeıtin bolyp shyqty. Buryn esirtki zattaryn jetkizip berip, tıisti oryndarǵa qoıyp ketý qyzmetin atqaryp, bertin kele «kásibi joǵarylap» óndirýmen shuǵyldanǵan. Onyń ústinen QR QK-niń 297-baby 1-bóligi boıynsha sotqa deıingi is júrgizilip jatyr, kúdikti ýaqytsha ustaý ızolıatoryna qamaldy.