Shahmat áleminde jeńilistiń kermek dámin az tatqan sportshylar neken-saıaq. Solardyń qatarynda 16 dúrkin álem chempıony, bıylǵy Álem kýboginiń ıegeri dańqty norvegııalyq shahmatshy Magnýs Karlsen bar. Aldyna kelgen qarsylasyn bet qaratpaı jeńetin Karlsen birer kún buryn Qatarda ótip jatqan halyqaralyq týrnırde taǵy bir márte jeńildi. Álemdik shahmat juldyzyn bul joly qazaq balasy Álisher Súleımenov qapy qaldyrdy.
Bul kúnderi Qatar astanasy Dohada shahmattan «Qatar Masters Open» týrnıri ótip jatyr. Álemniń eń myqty shahmatshylary jınalǵan halyqaralyq jarystyń ekinshi kezeńinde otandasymyz Álisher Súleımenov aty ańyzǵa aınalǵan shahmat sheberi Magnýs Karlsenmen oı jarystyryp, qarsylasyn qapy qaldyrdy. Bul Magnýs Karlsenniń karerasyndaǵy 15-shi jeńilis bolyp tirkeldi. Karlsen óziniń shahmat jolynda elimizdiń sportshylarymen úsh ret oınap, tek Rınat Jumabaevpen ǵana blıs shahmatta teń túsken eken. Al Pavel Kosýr, Murtas Qajǵalıev jáne Ánýar Ismaǵambetovtermen bolǵan oıynda Karlsen jeńiske jetken.
Sportty damytý dıreksııasynyń málimeti boıynsha, ulttyq qurama oıynshysy norvegııalyq shahmatshyǵa qarsy aq tústi fıgýralarmen óner kórsetti. Matchty sátsiz bastaǵan álem reıtınginiń kóshbasshysy 31 júristen keıin jeńilgenin moıyndady. 23 jastaǵy Álisher – Pavlodar shahmat mektebiniń túlegi. Qatardaǵy jarysta Álisherden bólek, otandastarymyzdan Rınat Jumabaev, Qazybek Nógerbek, Bıbisara Asaýbaeva, Alýa Nurmanova baq synap jatyr.
Rınat 2-týrda úndistandyq Shıamnıhıldy jeńse, Qazybek ózbekstandyq Javohır Sındarovqa jol berdi. Bıbisara Asaýbaeva ózbekstandyq Hýmoıýn Begmýratovtan basym bolsa, Alýa Nurmanova úndistandyq Pannerselvam Inııanmen teń tústi. Qazir Álisher men Rınat qana jeńilissiz kele jatyr.