Mádenıet jáne aqparat mınıstrligi Almaty jáne Abaı oblysynyń jastary úshin «Zhasproject» memlekettik grant jobasyna konkýrs jarııalap otyr. Joba kásip bastaǵysy keletin jastardy qoldaýǵa, oıǵa alǵan isin damytýǵa, kásibı daǵdylaryn arttyrýǵa jol ashady.
Abaı oblystyq Jastar resýrstyq ortalyǵynyń dırektory Aıdos Tóleýhanovtyń aıtýynsha, grant jobasynyń eń joǵary somasy 1 mıllıon teńge. «Zhasproject» jobasyna 18-35 jas aralyǵyndaǵy jastar qatysyp, baqtaryn synaı alady. Degenmen qoıylatyn talaptary da bar. Jumyssyz mártebesi bar jastar bolsa, az qamtylǵan otbasylardan shyqqan, jetim jáne múmkindigi shekteýli azamat bolsa nazarǵa alynady. Budan ózge múgedek balany tárbıelep otyrǵan ata-analarǵa, sondaı-aq «Altyn alqa» jáne «Kúmis alqa» marapatyn alǵan kópbalaly analarǵa erekshe basymdyq beriledi.
Abaı oblysy boıynsha 8 jeńimpaz anyqtalady. Qazir ótinimderdi qabyldaý bastalyp ketti. Aıaqtalý merzimi 23 qazanǵa mejelengen. Nátıjesi aldaǵy qarasha aıynyń 1-i kúni jarııalanyp, jeńimpazdarǵa grant berý 15 jeltoqsanǵa deıin júrgiziledi.
«1 mıllıon teńgeni utyp alý – jastar úshin jaqsy múmkindik. «Zhasproject» jobasy Semeıde 2018 jyly júzege asyrylǵan. Jastardyń kóbine jaqsy tanys deýge de bolady. Eń bastysy – jobanyń áleýmettik baǵyty men mańyzy zor. Basty shart – baıqaýǵa qatysýshy úmitkerler Abaı oblysynda turaqty tirkeýde turýǵa tıis», deıdi Jastar resýrstyq ortalyǵynyń dırektory A.Tóleýhanov.
Buǵan deıin de osyǵan uqsas jobany óz maqsatymen ushtastyryp, jurt qyzyǵatyn jaqsy is bastaǵandar bar eken. Aıtalyq, Abaı aýdanynyń Qaraýyl aýylynda turatyn Aıdyn Serikqazın qymyzdan balmuzdaq túrlerin jasap, otandyq naryqqa shyǵarýǵa jol taýypty. Jasy 25-ke endi kelgen azamat aldaǵy josparlarymen de bólisti.
«Semeıdegi Qarjy-ekonomıkalyq kolledjin bitire salysymen «Atameken» kásipkerler palatasynyń uıymdastyrýymen «Jas kásipker» baǵdarlamasyna qatysyp, 200 AEK mólsherindegi grantty jeńip alyp, 2019 jyldyń sońyna qaraı kásibimdi bastadym. Qymyzdan jáne saýmaldan balmuzdaq túrlerin shyǵarýdy qolǵa alǵanyma kóp ýaqyt bola qoımasa da qazirgi kúnde suranys artyp keledi. Almaty, Balqash qalalarynda jáne Abaı aýdanynda turaqty satylymǵa qoıylǵan. «Qazice» dep atalatyn, ıaǵnı qazaqtyń balmuzdaǵy degen maǵyna beretin bul balmuzdaqqa eshqandaı konservant qosylmaıdy. Qazir balmuzdaqtyń 18 túrin shyǵaramyz. Taza qymyz ben saýmaldyń ózinen jasalady. Bolashaqta shetelge shyǵarsaq degen oıymyz bar», deıdi jas kásipker A.Serikqazın.
«Jas kelse – iske» degendeı, tyń bastamalardy qolǵa alýmen qatar otandyq naryqtyń damýyna óz úlesterin qosýǵa umtylǵan jastardy mundaı memlekettik qoldaý turǵysyndaǵy múmkindikter áli de talaı ıgi isterge jeteleı beretini anyq.
Abaı oblysy