Búgin elordadaǵy Dostyq úıinde «Astana qalasy máslıhatynyń jumysyn uıymdastyrý jáne jergilikti ókildi organdardyń qyzmetin jetildirý tájirıbesi, Memleket basshysy Qasym-Jomart Toqaevtyń Joldaýy aıasynda reformalardy iske asyrý jónindegi zańnama máselesi» taqyryby boıynsha «Qazaqstan máslıhattary depýtattarynyń birlestigi» RQB Ortalyq Keńesiniń otyrysy ótti, dep habarlaıdy Egemen.kz.
Basqosý barysynda máslıhattardyń qazirgi kókeıkesti máseleleri men salalyq zańnamaǵa engizilmek tolyqtyrýlar men ózgerister talqylanyp, ortaq usynymdar men orıentırler anyqtaldy. Sonymen qatar birneshe plenarlyq sessııada mamandar arnaıy baıandamalar men dárister oqydy.
Is-sharaǵa «Qazaqstan máslıhattary depýtattarynyń birlestigi» RQB tóraǵasy Tóleýbek Muqashev moderatorlyq etse, Astana qalasy máslıhatynyń tóraǵasy Erlan Kanalımov elordalyq máslıhattyń jergilikti memlekettik basqarýdyń rólin arttyrýǵa qatysý tájirıbesimen bólisti.
«Elimiz Jańa da Ádiletti Qazaqstan qurýǵa batyl qadamdar jasap, jańa saıası-áleýmettik, ekonomıkalyq jaǵdaılar men syn-tegeýrinderge baılanysty Ulttyq ıdeıa men ıdeologııany qaıta qurylymdap jatyr. Tipten, tıimdilik turǵysynda jergilikti ózin-ózi basqarý máselelerin sheshýdiń jańa ádistemesine kóshe bastady. Memleket basshysy Joldaýynda máslıhattardyń ózekti máselelerdi sheship, aımaqtardaǵy turmys sapasyn jaqsartýǵa áser ete alatynyn basa aıtty. Tipten, «Jergilikti ózin-ózi basqarýdyń myqty júıesi azamattardyń ózi turatyn jerdegi turmys sapasyn jaqsartýǵa tikeleı qatysýyna negiz bolatynyn túsinýimiz kerek» dep atap ótti. Bizge álemdik joǵary deńgeıge ótý kerek», deıdi Tóleýbek Muqashev.
Bul rette Qostanaı oblysy máslıhatynyń tóraǵasy Saılaýbek Eshanov referendýmnyń qorytyndysy boıynsha Qazaqstannyń aralas saılaý júıesine kóshýin retteıtin birqatar zańdar qabyldanyp, nátıjesinde Májilis pen oblystyq máslıhattar depýtattarynyń bir bóligi jáne aýdandyq máslıhattardyń barlyq depýtattarynyń bir mandatty okrýgter boıynsha saılanǵanyn atap ótti.
«Bir mandatty okrýgter boıynsha depýtattar, partııalyq tizimderdegi depýtattar sııaqty saılaý aldyndaǵy úgit kezeńinde aıtylǵan saılaýshylardyń talap-tilekterin oryndaý jóninde belsendi jumys júrgizýde. Eger oń tájirıbe týraly aıtatyn bolsaq, bıyl máslıhat depýtattary oblystyq densaýlyq saqtaý salasynda júrgizilip jatqan reformalardy iske asyrýǵa barynsha belsendi qatysty. Túptep kelgende, máslıhattar óńirlerde Prezıdent saıasatyn júrgizýdiń basty tiregi bolýǵa tıis», dedi ol.
Aıta keteıik, jıynǵa QR Parlament Senaty men Májilis depýtattary, 20 óńir máslıhatynyń tóraǵalary, QR Úkimet músheleri men ortalyq memlekettik organdar basshylary, BAQ jáne azamattyq qoǵam ókilderi qatysty. Atap aıtqanda, QR Parlamenti Senaty depýtaty, QR Parlamenti Senatynyń Konstıtýsııalyq zańnama, sot júıesi jáne quqyqtyq qorǵaý organdary komıtetiniń tóraǵasy Nurlan Beknazarov, QR Ulttyq ekonomıka vıse-mınıstri Baýyrjan Omarbekov, Memlekettik jáne jergilikti basqarý ınstıtýtynyń rektory Ábiken Toqtybekov sóz alyp, jıyn kórigin qyzdyrdy. Olar negizinen eki másele – birinshiden, salalyq «Qazaqstan Respýblıkasyndaǵy jergilikti ózin-ózi basqarý týraly» Zań jobasynda kórinis tabýǵa tıis tolyqtyrýlar men ózgeristermen qatar – ekinshiden, bilim blogi, ıaǵnı máslıhat depýtattaryn úzdiksiz oqytý tujyrymdamasyna basymdyq berdi.
Budan bólek «Qazaqstan máslıhattary depýtattarynyń birlestigi» RQB tóraǵasy Tóleýbek Muqashev pen mádenıettanýshy-fılosof, polıttehnolog Abylaıhan Qalnazarovtyń birlesken avtorlyǵymen shyqqan «Máslıhat depýtaty qandaı bolýy kerek?» atty kitaptyń tusaýy kesilgenin aıta ketý kerek. Osynaý biregeı saıası ádebıet, Abylaıhan Qalnazarovtyń jetkizýinshe, máslıhattar jáne jalpy depýtattar taqyrybynda jaryq kórip otyrǵan tuńǵysh kásibı kitap.
Otyrys sońy «Qazaqstan máslıhattary depýtattarynyń birlestigi» RQB Ortalyq Keńesi otyrysy Qaýlysynyń qabyldanýy men máslıhat tóraǵalarynyń Astana qalalyq máslıhatynyń jumys tájirıbesimen tanysyp, birneshe nysandardy aralaýyna ulasty.
О́z kezeginde bul «Qazaqstan máslıhattary depýtattarynyń birlestigi» RQB men Astana qalasy máslıhatynyń birlesip uıymdastyrǵan kezekti is-sharasy. Keler jyldyń naýryzynda elimizde jergilikti ókildi organdar retinde máslıhattardyń qurylǵanyna 30 jyl tolady. Taraptar osy baǵytta da qala aýmaǵynda birqatar jobalardy qolǵa alýdy josparlap otyr.