Sońǵy ýaqytta kóp talqylanyp júrgen «qyz alyp qashý» salty týraly san túrli pikir bar. Bul áreketti qoldaıtyndar bolsa, týra sol sııaqty qoldamaıtyndar da jeterlik.
«Qazirgi ýaqytta «alyp qashý» degen durys emes. Eki jastyń kelisýimen bolǵan jaǵdaıda ony alyp qashý dep ataǵan durys emes bolar. Al zorlap, qınap, erkinen tys alyp qashý zańmen qýdalanady. Qyzdy alyp qashqan azamat zań aıasynda jazalanýy jón dep oılaımyn. Biz ul-qyzdarymyzǵa jaýapkershiliktiń ne ekenin, óziniń quqyǵyn bilýdi úıretýimiz kerek. Olardy oqytyp-toqytyp, bilimdi qylyp ósirýimiz kerek», deıdi belgili jýrnalıst Láıla Sultanqyzy.
Aıta ketý kerek, qyz alyp qashý – qazaqtyń kóne salty bolsa da, eger ol qyzdyń erkinen tys bolsa, zań boıynsha adam quqyqtaryn jáne bostandyq pen teńdiktiń negizgi qaǵıdalaryn buzý bolyp sanalady. Bul aýyr qylmys qataryna jatatyndyqtan, bas bostandyǵynan aıyrý túrindegi jaza taǵaıyndalatynyn eskergen jón.
Sondaı-aq qyz alyp qashýǵa baılanysty áreketter mán-jaılarǵa baılanysty adamdy urlaý (Qylmystyq kodekstiń 125-babymen 15 jylǵa deıingi merzimge bas bostandyǵynan aıyrý qarastyrylǵan) nemese bas bostandyǵynan zańsyz aıyrý (Qylmystyq kodekstiń 126-baby, 10 jylǵa deıingi merzimge bas bostandyǵynan aıyrý kózdegen) dep saralanýy múmkin.