Qostanaıdaǵy Nazarbaev zııatkerlik mektebiniń 12-synyp oqýshylary Erbolat Sembaev pen Ilııas Báıishev ınteraktıvti zııatkerlik oıyn ótkizýge arnalǵan onlaın júıe jasap shyǵardy. Olardyń oılap tapqan júıesi qatysýshylarǵa qoıylǵan ashyq saýaldardyń jaýabyn avtomatty túrde tekserip, durys-burysyn baǵalap otyrady.
О́tken jyly «QSOIL – Quest System of Interactive Learning – Interaktıvti oqytýdyń kvest júıesi» jobasyna avtorlyq quqyq alǵan jas talap Erbolat Sembaevtyń aıtýynsha, teorııa men tájirıbeni ushtastyrý arqyly ǵana mektepte sapaly bilim berýge qol jetkizýge bolady. Ol úshin túrli oqý ádisteriniń kómegine súıene otyryp, bilim alýǵa qulyqsyz oqýshylardy da yntalandyryp otyrý mańyzdy. Ilııas ekeýi jasap shyǵarǵan onlaın júıe ustazdarǵa oqýshylar oryndaǵan baqylaý jumystaryn tekserýge, qorytyndy baǵa shyǵarýǵa kómektesedi.
– Ǵylymı jetekshimiz Borıs Zelenovtiń offlaın rejimde ótkizip júrgen «Erýdıt» oıynyna tánti bolatynbyz. Qyzyqqanymyz sonsha, ustazymyzdyń kelesi zııatkerlik oıyndy ótkizgenin asyǵa kútetinbiz. Oıyn barysynda oqýshylar májilis zalyna jınalyp, toptarǵa bólinip, qaǵazǵa jazylǵan suraqtarǵa jaýap berip, qyzyqty vıktorınalyq jarysqa qatysatyn. Al biz jasap shyǵarǵan joba – sol «Erudit Plus» – «Erýdıt» oıynynyń elektrondy nusqasy. Oıynnyń elektrondy nusqasy yńǵaılyraq ári oǵan birden birneshe synyptyń oqýshylary qatysa alady, – deıdi Erbolat Sembaev.
«Go» dep atalatyn baǵdarlamalaý tilinde ázirlengen jobany iske asyrý barysynda oqýshylar «Web sockets» tehnologııasy men «Postgres» jáne «Docker» málimetter qoryn paıdalanǵan. Jas ónertapqyshtardyń ǵylymı jetekshisi Borıs Zelenovtiń aıtýyna qaraǵanda, atalǵan tehnologııanyń kúrdeli taqyryptardy ońaı ıgerýge, oqýshylardyń bilim sapasyn arttyrýǵa kómegi zor.
– Shákirtterim oılap tapqan jańa júıeni qarasha aıynda tájirıbeden ótkizip, tuńǵysh ret resmı bilim jarysyn ótkizýdi josparlap otyrmyz. Odan keıin oblys, respýblıka kólemine shyǵýǵa talpynyp kóremiz, – deıdi aqparattyq tehnologııa pániniń muǵalimi Borıs Zelenov.
Qostanaı oblysy