Jýrnalıst, aýdarmashy, velomarafonshy Ernat Melsuly Respýblıka kúnine oraı Astana qalasynda 106 shaqyrymdy basyp ótti. Túrkııanyń Qazaqstandaǵy Elshiligi ǵımaraty mańynan bastalǵan 106 shaqyrymdyq marafondy áriptesimiz 6 saǵatta óndirdi.
«Solo» ádisindegi marafonda jalǵyzilik jolǵa shyqqan Ernat Astana qalasyn aınalyp júrdi. «Men bul marafondy Respýblıka kúnine jáne baýyrlas Túrkııa memleketiniń 100 jyldyǵyna arnaımyn. Anadolydaǵy túrik aǵaıynnyń túp qazyǵy, ata jurty – qazaqtyń jeri Altaı ólkesi. Mustafa Kemel Atatúrik 1924 jyly Túrik Respýblıkasyn qurdy. Al Álıhan Bókeıhan bastaǵan Alash arystary bir týdyń astyna birigip, 1917 jyly Alash avtonomııasynyń qazyǵyn qaqty. Respýblıka kúnine oraı josparlaǵan velosherýde mejelegen ýaqytta kelýime kúzdiń qara sýyǵy aıtarlyqtaı kedergisin keltirip keshigip jettim. Qarsy soqqan jel jyldamdyǵymdy tejese, arqamdy qaryǵan yzǵar da bógesin boldy. 60 shaqyrymnan keıin jarty saǵatqa aıaldap, as-sýymdy ishtim, odan keıin toqtaǵam joq. Ata-babalarymyzdyń azattyq jolyndaǵy arpalysqa toly eńbegin, táýelsizdikke qol jetkizý úshin bastaryn qaterge tikkenin keıingi urpaq umytpaýy tıis. Egemendiktiń nyǵaıýyna ár azamat óziniń tıtteı de bolsa úlesin qosýy kerek dep sanaımyn. Sondyqtan da elimiz úshin aıtýly mereke qarsańynda «Surjekeıimdi» (velosıped) saılap jolǵa shyqtym. Mejelegen qashyqtyq 100 shaqyrym bolýy tıis edi. Halyqaralyq sertıfıkat berilgen Strava qosymshasynyń kórsetkishi boıynsha basyp ótken jolym – 106 shaqyrym. Bul san da kezdeısoqtyq emes dep paıymdaımyn, sebebi bıyl Álıhan Bókeıhan bastaǵan Alash arystary qurǵan ulttyq memleket – Alash avtonomııasyna 106 jyl toldy. Byltyr ult ustazy Ahmet Baıtursynulynyń 150 jyldyq mereıtoıy IýNESKO kóleminde toılandy. Qaıratkerdiń mereıtoıyna oraı týǵan topyraǵy Torǵaıdan shyǵyp 55 kún júrip, Ystanbul qalasyna deıin 5555 shaqyrym joldy velosıpedpen óndirdim», deıdi E.Melsuly.
Velomarafonshy kelesi jyldyń sáýir aıynda Túrkııa elinen bastap, Eýropa qurlyǵynyń 10 memleketin kókteı ótip, jazǵy Olımpıada oıyndary uıymdastyrylatyn Parıj qalasyna deıin barýdy josparlap otyr. Ol bul sherýin akademık Qanysh Sátbaevtyń týǵanyna 125 jyl jáne musylman halyqtary arasynan tuńǵysh bolyp taekvondadan 6-dan ıegeri atanǵan Mustafa О́ztiriktiń týǵanyna 70 jyl tolýyna oraılastyrmaq.
Velosherýshini Túrkııanyń Qazaqstandaǵy Tótenshe jáne О́kiletti elshisi Mustafa Kapýdjý bastaǵan bastamashyl top Esil ózeniniń jaǵalaýyndaǵy Mustafa Kemal Atatúrik eskertkishiniń aldynda saltanatpen qarsy aldy.