«Kezdesseń urlana qaraımyn, asaýdaı týlaıdy jas júrek...», dep «Jas qalam» ánin shyraıyn kirgizip shyrqaıtyn Arqanyń aıaýly ánshisi Seıil Aıaǵanovtyń orny, ókinishke qaraı, oısyrap tur. Jaqynda ǵana sulý ánge adaldyq tanytyp ótken ónerpazdyń turǵan úıine eskertkish taqta ornatyldy.
Memorıaldyq taqtanyń ashylý rásimi marqumnyń týǵan kúnine oraı uıymdastyryldy. Taǵylymdy is-shara bastalmas buryn ánshiniń «Jas qalam», «Tań samaly» ánderin jıylǵan jurt tereń tebirenispen tyńdady. Aıaýly ulyn saǵynǵan eldiń kózine eriksiz jas irkildi.
Memorıaldyq taqtany oblys ákiminiń orynbasary Baýyrjan Asanov, ult rýhanııatynyń janashyry, Qazaqstannyń eńbek sińirgen qaıratkeri, Qaraǵandy oblysynyń Qurmetti azamaty Rymbala Omarbekova, Seıil marqumnyń dosy, daryndy ánshi Erlan Tóleýtaı, týǵan baýyry, sazger Shyńǵys Muqaev ashty. Ákimniń orynbasary B.Asanov sóz sóılep, halqynyń aıaýly perzenti haqynda jyly lebizin jetkizdi. «Seıil Aıaǵan – ǵumyryn ánge arnaǵan shyn talant. Onyń esimi, daýysy eliniń júreginde saqtalary sózsiz. Sizderdeı tyńdarmany barda Seıil ánshi ólmeıdi. Osyndaı asyl týǵan uldarǵa qurmet kórsetý – bizdiń paryzymyz. Qazaq ániniń odan ári jańǵyrýyna zor úles qosty. Aıanbaı eńbek etti. Sońyna deıin ánge bergen sertinen taımady», dedi Baýyrjan Qońyrbaıuly.
Almatydan arnaıy kelgen E.Tóleýtaı ánshi baýyrynyń jyly júzin, syrshyl júregin saǵynǵanyn aıtyp, kózine jas aldy. «Seıil baýyrymnyń ekinshi ǵumyry uzaq bolady dep senemiz. Rýhyna kórsetilgen qurmet munymen toqtamaıdy dep oılaımyn. Keleshekte Seıil ánshini eske alý keshteri ótedi dep kútemiz. Sonymen qatar Seıilge Qaraǵandydaǵy Juldyzdar alleıasynan oryn berý kerek degen usynys bildiremin», dedi óner janashyry.
Dástúrli ánniń dúldúli Jaqsygeldi Kemalov ta ánshi baýyryna degen ystyq saǵynyshymen bólisti: «Seıil ekeýmizdiń týǵan kúnimiz qatar. Ekeýmiz bir-birimizdi kún qyrdan kóterile bergende quttyqtap otyrýshy edik. Bıyl baýyrym habarlaspady. Telefonym únsiz. О́zegime óksik tyǵyldy. Qaıran baýyrym-aı! О́zgeniń baqytyna baladaı qýanatyn taza júregi toqtady. Án de kimge qonaryn biledi ǵoı, shirkin».
Aqyn, Qazaqstan Jazýshylar odaǵynyń múshesi Qaırat Asqar ánshige arnaǵan óleńin oqyp berdi. Mádenı is-shara aıaýly ánshiniń sońynda qalǵan shyraqshysy Qymbat Túsipbekovanyń osyndaı ıgilikti sharaǵa atsalysqan azamattarǵa rızashylyq bildirýimen túıindeldi. Osylaısha, Seıil seri Qaraǵandy jurtshylyǵyna qara taqtadan qarady. Qara taqtaǵa moıyn buryp siz qarasańyz, ánshiniń jyly júzi kóz aldyńyzǵa, qońyr úni qulaǵyńyzǵa keledi. «Juldyzdar alleıasynda juldyzy jarqyrasa», degen Erlan Tóleýtaıdyń sózin biz de qýattaımyz.
Qaraǵandy oblysy