Kereký óńirinde kesheden beri yzǵarly jel turyp, qar ushqyndaı bastaǵany sol, ekibastuzdyq turǵyndar jaýrap jatyrmyz dep dabyl qaqty. Qalanyń №19 shaǵyn aýdanyndaǵy kóppáterli tórt úıde jylý da, ystyq sý da joq. Jylytqyshpen boı jylytqan otbasylar jergilikti ákimdiktiń ýádesine toıyp boldyq dep otyr.
Alty balanyń anasy Móldir Tólegenovanyń aıtýynsha, páteriniń ishi azynap tur. Otbasy músheleri bir bólmege jınalyp, qýat kózine qosylǵan jylytqyshpen jan saqtap otyrǵan kórinedi.
«Mámetova kóshesi, 54/1-úıde turamyz. Páterimiz – úsh bólmeli. Qalada ótken jyldyń sońynda apat oryn alǵaly ystyq sý degendi umyttyq. Endi mine, taǵy kún yzǵarlanyp, qarashanyń qara sýyǵy jaqyndap qaldy. Ákimdiktegiler men jylý berý mekemesiniń mamandary ýádeni úıip-tókkenimen, jylý áli kúnge berilmeı tur. Elektr jaryǵy úshin ótken aıda 8 myń teńge tólesem, osy aıda túbirtektegi soma odan da zor shyǵatynyn bilip otyrmyz. Basqa amalymyz joq. Balalarymnyń barlyǵy aýyryp jatyr. Bárinen buryn kishi qyzyma qıyn, jerge túsip eńbektegisi keledi. Alaıda eden muzdaı, aıaq shydatpaıdy. Bizdiń úıde PIK degen atymen joq. Jańa úı degen aty bolmasa, terezelerinen jer úrlep, páterimiz azynap tur», dep muńyn shaqty turǵyn.
Mámetova kóshesi, 54/4-úıde turatyn taǵy bir kópbalaly ana Ásem Qýanysheva da onyń sózin qýattap otyr. Aıtýynsha, turǵyn úı-kommýnaldyq sharýashylyq bólimi, turǵyn úı ınspeksııasyndaǵylar esh áreket ete almaı jatyr eken. Bul otbasy jylytqyshtardy kóp paıdalanyp, aı saıyn jaryq úshin 13 myń teńge tólep otyrmyz dep muńyn shaqty. Úsh bólmeli páter bola tura otbasy músheleri bir bólmege qamalyp otyrǵan jaıy bar.
Anyqtaǵanymyzdaı, Mámetova kóshesindegi álgi tórt úıdiń árqaısysynda 80 páterden bar eken. Sonda búginde tek bir shaǵyn aýdanda 320 páter jylýsyz otyr degen sóz. Qalalyq máslıhattyń depýtaty Erkin Qusan Mámetova kóshesi, 54/2-úıdiń janyndaǵy jylý magıstralinde aqaý shyqqanyn, jóndeýshiler qazir ony qalpyna keltirý jumystarymen shuǵyldanyp jatqanyn jetkizdi. Búginde jylý-energııa ortalyǵy da jylý parametrlerin kótere qoımaǵan. Buǵan deıin Berkimbaev kóshesi, 99-úıdiń turǵyndary da jylýǵa qosylmaı jatqanyna shaǵymdanyp, ol jerdegi másele endi sheshilipti.
Al Ekibastuz qalasynyń ákimi Aıan Beısekın shahardyń biraz bóliginde jylýǵa tolyq qosylmaǵan úılerdiń bar ekenin jasyrmady. Bulardy osy bir-eki kúnde jylýmen tolyq qamtımyz dep sendirip otyr. Onyń dereginshe, jeke úıler sektorynda 100-ge jýyq baspanaǵa jylý ázirge enbegen. Bıyl ala jazdaı shahar kóshelerinde jelilerdi jóndeý júrgizilgeni málim. Jańadan shyǵyp jatqan aqaýlardyń kóbi eski qubyrlarǵa tıesili kórinedi. Áıtse de, buǵan deıingi synaý jumystarynda arnaıy brıgadalar olardy qalaı ańǵarmaı qalǵany tańǵaldyrady.
Oblys ákiminiń baspasóz qyzmeti taratqan málimetke súıensek, ótken aptada ǵana oblys basshysy Asaıyn Baıhanov Ekibastuzdaǵy JEO-da jedel shtabtyń otyrysyn ótkizipti. Qazir munda tórt qazandyq iske qosylyp, bireýi rezervke alynǵan. Qalǵan bes qazandyqtaǵy jóndeý jumystaryn mamandar qazan aıynyń sońyna deıin aıaqtamaq. О́ńir basshysy apta saıyn Pavlodar men Ekibastuz arasyna shapqylap júr. Alaıda 24 qazanǵa deıin shahardaǵy baspanalar jylýmen tolyq qamtylady degen ýáde oryndalmaı qalatyndaı. Sebebi joǵaryda atalǵan mekenjaılardan bólek, jylýǵa jarymaı otyrǵan kóppáterli turǵyn úıler áli de barshylyq. Problemaly úılerdiń deni Abaı, Berkimbaev, Bógenbaı batyr, Kósherbaev, Matrosov, Moldaǵulova, Máshhúr Júsip, Sátbaev, Toraıǵyrov, Sheshembekov, Energetıkter kóshelerinde ornalasqan. Qara kúz túspeı jatyp jylýǵa jarymaǵan kómirli shahardyń jurty Arqanyń saqyrlaǵan sary aıazynda úıimizde úsip qalmaımyz ba dep alańdap otyr.
Pavlodar oblysy,
Ekibastuz qalasy