Sharýasy qojyramaǵan qojalyq

Jıyrma úsh jyldan beri dala tósinde sharýasyn kúıttegen qojalyqta búginde 70 bas jylqy, 200 bas qoı-eshki, 40 túıe, 20 sıyr bar. Mal-jan jerasty sýyn óndiretin fontan arqyly sýarylady. «Qalaýyn tapsa, qar janar» demekshi, sharýashylyq ıeleri mal ósirýmen birge egin egýdi de qolǵa alyp, táp-táýir ónim alyp keledi. Tipti eki jyldan beri sý kózi janynan salynǵan alańda móńke balyǵynyń 1 500 shabaǵy ósirilip-bap­ta­lyp otyr.

Bul sharýashylyq Mańǵystaý dalasy­nyń tabıǵatyna kez kelgen ósimdik túri óse bermeıdi degen syńarjaq pikirdi jartylaı bolsa da joqqa shyǵardy deýge bolady. Olar egin sharýashylyǵy bo­ıynsha jalpy 35 ga jerge qorshaý jasap, 2022 jyly ashyq topyraqta 2 ga qaýyn-qarbyz egip, 50 tonna kóleminde ónim jınap, aýyl-aımaqty jergilikti tańsyq dámmen qamtamsyz etýge óz úlesterin qosty. Sondaı-aq 2019 jyly 1,5 ga jerge jo­ńyshqa egilip, kúni búginge deıin ónim aly­nyp keledi, qosymsha 150 túp jemis aǵashyn da otyrǵyzdy.

Klımaty qurǵaq Mańǵystaý óńirinde keıbir jyldary jaýyn-shashynnyń tapshylyǵy ushyrasyp turady. Sol sebepti sharýashylyqta 2022 jyldan bastap dıametri 548 m (25 ga) jerdi qamtıtyn, Túrkııa elinen ákelingen sheńberli jańbyrlatqysh qurylǵysy ornatyldy. О́tken jyldan bastap oblystyq «Botanıkalyq eksperımentaldyq baǵy» úsh jyl merzimge sharýa qojalyǵynda shóptesin ósimdikterdi ósirýge tájirıbe júrgizip bastady. Sharýashylyq ıeleri «Nysap» jeri mańynan shabyndyqqa alynǵan 2 500 ga jerden 8 000 túk shóp daıyndap, Jarmysh, Shetpe halqyna qol jetimdi baǵada satyp otyrdy.

– Sharýashylyǵymyzdyń jumysyn jetildire júrgizý basty nazarda. О́zi­miz­diń kúshimizben birge memlekettik qoldaýlar da bizge demeý bolyp otyr. 2022 jyly 1 traktor, 1 shópshapqysh, 1 tyrma, 1 shóptaılaǵysh, 1 soqany lızıngke alyp, memleketten 5 mln teńge kóle­min­de sýbsıdııa berildi. 2021 jyly qýań­shylyqqa baılanysty jemshópke Úkimet rezervinen bólingen qarjydan 1 070000 teńge kómek qarajat berildi, bul – biz úshin kómek, – deıdi sharýashylyq basshysy Ybyraı Quljanov.

Mańǵystaý oblysy