Respýblıka kúnine oraı Qorǵanys mınıstri úzdik áskerı qyzmetshilerdi marapattady. Saltanatty jıyn elordanyń E.Rahmadıev atyndaǵy Memlekettik akademııalyq fılarmonııasynda qorǵanys vedomstvosy, Qarýly Kúshter túrleri, ásker tekteri, áskerı bólimder men mekemeler, oqý oryndary basshylyq quramynyń, áskerı qyzmetshilerdiń, azamattyq personal ókilderiniń jáne Qarýly Kúshter ardagerleriniń qatysýymen ótti.
Qorǵanys mınıstri, general-polkovnık Rýslan Jaqsylyqov jınalǵan qaýymdy, jeke quram men ardagerlerdi ulttyq mereke – Respýblıka kúnimen quttyqtady.
– Osynda jınalǵandardyń kóbi – táýelsiz Qazaqstannyń qalyptasý jolyndaǵy alǵashqy tarıhı qadamdardyń qalaı bastalǵanyn kórgender. Elimiz BUU-ǵa múshe bolǵan kezde Memlekettik rámizder bekitildi, qazaq tili memlekettik mártebege ıe boldy. О́z ómirin bostandyq úshin kúreske arnaǵan qazaq halqynyń zııaly qaýymynyń adal esimderi aqtaldy. Bul sharalar memlekettiń turaqty damýynyń, onyń halyqaralyq bedeli ósýiniń, eldegi birlik pen kelisimniń nyǵaıýynyń kepili boldy, – dep atap ótti ol. Qorǵanys vedomstvosynyń basshysy Qarýly Kúshterdiń beıbitshilikti saqtaýdaǵy jáne eldiń qorǵanys qabiletin nyǵaıtýdaǵy rólin, sondaı-aq ardagerlerdiń egemen Qazaqstan armııasynyń qalyptasýyna jáne áskerı-patrıottyq tárbıe isine qosqan baǵa jetpes úlesin erekshe atap ótti.
Respýblıka kúnine oraı birqatar áskerı qyzmetshige Qorǵanys mınıstri Rýslan Jaqsylyqov memlekettik marapattar tabys etti. Atap aıtqanda, II dárejeli «Dańq» ordenderi Bas shtab bastyǵynyń orynbasary – Jedel josparlaý departamentiniń bastyǵy general-maıor Marat Aımashevqa, «Astana» О́ńirlik qolbasshylyǵy áskerleriniń qolbasshysy, general-maıor Shaıh-Hasan Jazyqbaevqa berildi. Qurlyq áskerleri bas qolbasshysynyń basqarmasy ınjenerlik áskerler bas basqarmasynyń basshysy, polkovnık Baqytbek Tájibaevqa II dárejeli «Aıbyn» ordeni tabys etildi. Semeı qalasy Áýe qorǵanysy kúshteri 54835 áskerı bólimi tárbıe jáne ıdeologııalyq jumys bóliminiń ofıseri, leıtenant Názıra Álbosynova azamattyq jáne áskerı boryshyn úlgili oryndaǵany úshin «Jaýyngerlik erligi úshin» medalimen marapattaldy. Astana qalasy Qarý-jaraq bastyǵynyń basqarmasy 83205 áskerı bóliminiń tehnık-júrgizýshisi, serjant Erik Ysqaqov elimizdiń qorǵanys qabiletin, áskerı qaýipsizdigin nyǵaıtýǵa qosqan eleýli úlesi úshin «El qorǵany» medaline laıyq dep tanyldy. «Qazaqstan Respýblıkasy Qarýly Kúshteriniń úzdigi» tósbelgilerimen 68665 áskerı bóliminiń mamany, merzimdi qyzmettiń qatardaǵy jaýyngeri Erkebulan Seıdahmet, Aqmola óńirlik garnızony Áskerı polısııa basqarmasynyń aǵa sarbazy, merzimdi qyzmettiń efreıtory Ilıa Mamatov marapattaldy. Prezıdent Jarlyǵymen Qarýly Kúshterdiń 31 áskerı qyzmetshisi memlekettik nagradalarǵa ıe boldy. Vedomstvolyq marapat – «El qorǵany» medalin 27 áskerı qyzmetshi ıelendi. «Mınasyzdandyrýdaǵy erligi úshin» tósbelgiler mınadan tazartýǵa qatysqan 25 mamanǵa berildi. Alǵash ret «Qazaqstan Respýblıkasy Qarýly Kúshteriniń úzdigi» tósbelgisimen merzimdi qyzmettiń 70 áskerı qyzmetshisi marapattaldy. Sondaı-aq Qorǵanys mınıstriniń buıryǵymen QR Qarýly Kúshteriniń 42 áskerı qyzmetshisine merziminen buryn kezekti áskerı ataq berildi. Marapattaý rásimi Qarýly Kúshter Ulttyq áskerı-patrıottyq ortalyǵynyń shyǵarmashylyq ujymy daıyndaǵan merekelik konsertpen jalǵasty.