Fransııa jáne halyqaralyk kitap qory qazaq ádebıetimen tolyqty. Fransııanyń Halyqaralyq Konkord Akademııasynyń múshe-korrespondenti, fılologııa ǵylymdarynyń doktory, professor, Qazaqstan Respýblıkasy Pedagogıkalyq Ǵylym Akademııasynyń tolyq múshesi-akademıgi Alpysbaı Musaevtyń úsh tomdyq tańdamaly shyǵarmalar jınaǵyna onyń zertteý, ádebı syn jáne ǵylymı maqalalary, monografııalary engizilgen. Parıjdegi «Editions du Jipto» basylymynda jaryq kórgen shyǵarmalar jınaǵy oqyrmandarǵa elektrondyq katalogta da qoljetimdi.
Eńbektiń birinshi tomynda avtordyń «Jandy júıe», «Rýh bostandyǵynyń jyrshysy», «Tarazı taǵylymy» monografııalary jınaqtalsa, ekinshi tomynda «Qanatty qalamger», «Kórkem sózdiń kórnekti ókili» jáne otandyq jáne shetel basylymdarynda jaryq kórgen maqalalar jınaǵy toptastyrylǵan.
«Jandy júıe» monografııasy qazaq poezııasynyń kórnekti ókili Jarashan Ábdirashev eńbekteriniń kórkemdik sıpaty men ereksheligine arnalǵan. Al «Rýh bostandyǵynyń jyrshysynda» QR Memlekettik syılyǵynyń ıegeri, jazýshy Dúkenbaı Dosjannyń qalamgerlik sheberligi, stıldik ereksheligi aıtylady. Aty aıtyp turǵandaı «Tarazı taǵylymynda» avtor jazýshy, dramatýrg, Qazaqstannyń eńbek sińirgen qaıratkeri, Memlekettik syılyqtyń laýreaty Ákim Tarazı shyǵarmashylyǵyn taldap, ádebı zertteý júrgizgen.
Al eńbektiń úshinshi tomy ádebı zertteýler qamtylǵan «Ádebıet ıirimderine» arnalǵan. Alpysbaı Musaev shetelderdiń ǵylymı ortasyna tanylǵan elimizdegi sanaýly ǵalymdardyń biri. Professor IýNESKO ortalyǵynda taǵylymdamalardan ótip, Fransııa, Avstrııa, Italııa ýnıversıtetterinde dáris oqydy, eńbekteri shetel baspalarynda jarııalandy.