Kostenko atyndaǵy shahtadaǵy órtten qaza tapqan taǵy jeti adamnyń máıiti tabyldy. Bul týraly Qaraǵandy oblysy ákimdiginiń baspasóz qyzmeti málim etti, dep habarlaıdy Egemen.kz.
«Saǵat 15:00-degi jaǵdaı boıynsha 28 adamnyń máıiti tabyldy, 18 kenshi áli de izdestirilip jatyr», delingen habarlamada.
«ArselorMıttalTemirtaý» AQ Kómir departamentiniń Kostenko atyndaǵy shahtadaǵy avarııalyq-qutqarý jumystaryna «Kásibı áskerılendirilgen avarııalyq-qutqarý qyzmetteriniń respýblıkalyq ortalyq shtaby» JShS Qaraǵandy fılıalynyń taý-ken qutqarýshylary jumyldyryldy.
Aqparattyq jáne psıhologııalyq qoldaý úshin Qaraǵandy – (8-7212) 51-72-23 (TJD), (8-7212) 49-72-70 («ArselorMıttal Temirtaý») jáne Astanada – (8-7172) 70-41-08 jedel jeli telefondary jumys isteıdi.
Eske salaıyq, «ArselorMıttal Temirtaý» AQ-ǵa qarasty Kostenko shahtasynan órt shyqty. Prezıdent Úkimetke «ArselorMıttalTemirtaý» kompanııasymen ınvestısııalyq yntymaqtastyqty toqtatýdy tapsyrdy. Bas Prokýratýra atalǵan iske qatysty sotqa deıingi tergep-tekserýdi bastady. Memleket basshysynyń tapsyrmasyna sáıkes Premer-mınıstr Álıhan Smaıylovtyń tóraǵalyǵymen Qaraǵandy oblysynda «ArselorMıttal Temirtaý» AQ-nyń Kostenko atyndaǵy shahtasynda oryn alǵan apattyń sebepterin tergeý jáne onyń saldaryn joıý jónindegi Úkimettik komıssııa quryldy. Memleket basshysy Qasym-Jomart Toqaev apattyń mán-jaıyn anyqtap, tıisti sheshim qabyldaý úshin Qaraǵandy oblysyndaǵy qaıǵyly oqıǵa oryn alǵan jerge bardy.