Kostenko atyndaǵy shahtanyń dırektory qaza bolǵan kenshilerdiń esimderin atady, dep habarlaıdy Egemen.kz.
Shahta dırektory Sergeı Mýstıvko qaıtys bolǵan jáne zardap shekken kenshilerdiń týystarymen kezdesýde qaza tapqan shahterlerdiń esimderin aıtty. Olar:
Mordasov Vıtalıı Anatolevıch;
Iýgaı Aleksandr Vıktorovıch;
Adampaev Erbolat Muratuly;
Petrenko Vladımır Ilıch;
Saıfýtdııarov Albert Rıfovıch.
Onyń aıtýynsha, qalǵan máıitterdi anyqtaý ázirge múmkin emes.
Sońǵy málimetter boıynsha, Kostenko atyndaǵy shahtadaǵy órtten 33 kenshi qaıtys boldy, 13 adam izdestirilip jatyr. Olardy izdeý túnge deıin jalǵasady.
Eske salaıyq, «ArselorMıttal Temirtaý» AQ-ǵa qarasty Kostenko shahtasynan órt shyqty. Prezıdent Úkimetke «ArselorMıttalTemirtaý» kompanııasymen ınvestısııalyq yntymaqtastyqty toqtatýdy tapsyrdy. Bas Prokýratýra atalǵan iske qatysty sotqa deıingi tergep-tekserýdi bastady. Memleket basshysynyń tapsyrmasyna sáıkes Premer-mınıstr Álıhan Smaıylovtyń tóraǵalyǵymen Qaraǵandy oblysynda «ArselorMıttal Temirtaý» AQ-nyń Kostenko atyndaǵy shahtasynda oryn alǵan apattyń sebepterin tergeý jáne onyń saldaryn joıý jónindegi Úkimettik komıssııa quryldy. Memleket basshysy Qasym-Jomart Toqaev apattyń mán-jaıyn anyqtap, tıisti sheshim qabyldaý úshin Qaraǵandy oblysyndaǵy qaıǵyly oqıǵa oryn alǵan jerge bardy. 29 qazan elimizde Jalpyulttyq aza tutý kúni dep jarııalandy.