Zamanynda akademık Qanysh Sátbaev paıdalanǵan jazý máshińkesi tabyldy. Jádigerdi baıanaýyldyq erli-zaıypty Mıhaıl jáne Galına Baek otbasy osy ýaqytqa deıin saqtap kelgen.
«Iаnalıf» markaly jazý máshińkesi shamamen ótken ǵasyrdyń 20-jyldary Eýropada shyǵarylǵan. Baıanaýyl turǵyny Mıhaıl Baektiń aıtýynsha, arǵy naǵashy atasy Leontıı Beldınınov feldsher bolypty. Tóńirektegi adamdardy dástúrli jáne halyq emimen emdep, shıpaly qoldarymen talaı janǵa ómir syılaǵan. Ol zamanynda Qanysh Sátbaevpen óte jaqyn aralasqan. Qanaǵań Tomda oqyp júrgende sýyq tıdirip, ókpe aýrýyna shaldyqqanyn bilgen soń týǵan jerine kelip uzaq emdeledi. Sol ýaqytta feldsher L.Beldınınov ony Baıanaýyldaǵy aýrýhanada, keı ýaqytta óz úıinde qabyldap, qymyzben emdeıdi. Keıingi jyldary da ǵalym týǵan eline kelgende aq jeleńdi abzal jannyń úıine baryp sálemdesip, qona jatyp áńgimelesken. Keıin emshiniń kúıeý balasy Aleksandr Cherkashın Sátbaevpen tanysyp, akademıktiń sharapatyn molynan kórgen eken. Ol negizgi mamandyǵy býhgalter bola tura, Qanaǵańnyń aqylymen birneshe kitap jazyp, keıin jergilikti «Pobeda» gazetinde tilshi bolyp jumys istegen.
– Qazirgi biz turyp jatqan úıimiz – bir ǵasyrdan astam ýaqyt buryn arǵy atamyz Leontııdiń qolymen salynǵan tarıhı baspana. Qanysh aǵa munda uzaq ýaqyt aıaldaǵan. Týǵan eline kelgen saıyn qonady. Bul máshińkeni Sátbaevtyń ózi ákelip, atamyz A.Cherkashınge tartý etýi de ǵajap emes. Sebebi mundaı qymbat qurylǵyǵa ol ýaqytta ekiniń biriniń qoly jetpegeni anyq. Al Cherkashın bul máshińkede úsh birdeı kitap jazǵan: «Baıanaýl», «Doch Baıanaýla», «Sýdba Kosýma». Alǵashqy jáne sońǵy kitaptary qoljazba kúıinde qalsa, ekinshi kitaby baspa betin kórgen. Sátbaev Baıanaýylǵa kelip turǵanda bul máshińkede jumys istegeni anyq. Sebebi ol kisi júrgen jerinde únemi hat-habar, maqala jazýmen aınalysatynyn ájemiz Kapıtolına Cherkashına aıtyp otyratyn, – deıdi M.Baek.
Ulydan qalǵan jádiger Buqar jyraý atyndaǵy ádebıet jáne óner mýzeıine tapsyryldy.
Pavlodar oblysy