Syńsyǵan ormandy alqaby mol Aqmola oblysynda «Orman-dala-2023» oqý-jattyǵý ótkizildi. Ormanǵa qaýip kóp ekeni belgili. Bıyl eresen ystyq boldy. Kirpik qaqpaı atqarylǵan yjdaǵatty kúzettiń kómegimen aýqymdy órt oryn alǵan joq. Áıtse de, saqtanǵannyń saý bolatyny málim.
Oqý-jattyǵý jumystarynyń basty maqsaty – orman jáne dala órti oryn ala qalǵan jaǵdaıda birlesken is-qımyldy meılinshe pysyqtaý. Barlyq qyzmet arasynda órtti jedel sóndirýdiń tıimdi ádis-tásilderi týraly tájirıbe almasý. Bul, shyn máninde, óte qajet dúnıe. Alapat órt bastalǵan kezde kópti kórgen orman qorǵaýshylardyń ózderi abdyrap qalatyn da kez bolady. Tylsym tabıǵat taqsiret tartpaý úshin órt oqıǵasynyń aldyn alý jáne lezde oqshaýlap, sóndirý tásilderi jetildirile bermek.
Oqý-jattyǵý jumysyna Tótenshe jaǵdaılar mınıstrliginiń, Ekologııa jáne tabıǵı resýrstar mınıstrliginiń, jergilikti ákimdikterdiń ókilderi, tótenshe jaǵdaılar departamentiniń qyzmetkerleri jáne eriktiler qatysty.
Qatysýshylar órt shyqqan jerdi áýeden tekserip, aýqymyn anyqtaǵannan keıin órt sóndirýshiler desantyn túsirip, zardap shekkenderdi qutqarmaq. Orman sharýashylyǵy mekemeleriniń kúshteri men qural-jabdyqtary meılinshe tıimdi jumyldyrylmaq. Mine, osyndaı jumystardy saralaǵannan keıin ózara is-qımyldy utymdy úılestirý máselesi talqylandy. Tilsiz jaýdyń qaýpi óte zor. Sondyqtan qyzyl tili sýmańdaǵan órttiń sharpýy múmkin dep eseptelgen aýyl-aımaqtyń turǵyndaryn qaýipsiz jerge kóshirip, ýaqytsha ornalastyrý máselesi de bastan jaqty aıyrǵandaı etip táptishteldi. Olarǵa medısınalyq jáne psıhologııalyq kómek kórsetý jaıy da eksheldi. Jattyǵýǵa 250-den asa adam, 100-den asa tehnıka jáne 5 tikushaq jumyldyryldy.
– Bul formattaǵy oqý-jattyǵý jumystary alǵash ret ótkizilip otyr. Eger jaǵdaı kúrdeli bolsa, barlyq respýblıkalyq kúsh-qýat jumyldyrylady. Biz búgin Orman kodeksine jáne ilespe normatıvtik-quqyqtyq aktilerge ózgeristerdi engizýdi talap etetin normalar men zańnamalardy talqyladyq, – deıdi Tótenshe jaǵdaılar mınıstrliginiń О́rtke qarsy qyzmet komıtetiniń tóraǵasy Ramıl Kamalov.
Aýqymdy is-sharanyń sońynda orman jáne dala órtin sóndirý tásilderi men taktıkasy pysyqtaldy.
Aqmola oblysy,
Aqkól aýdany