Tótenshe jaǵdaılar mınıstri Syrym Sháriphanov kenshilerdi izdestirý jumystary boıynsha jańa málimetterdi aıtty, dep habarlaıdy Egemen.kz.
Onyń aıtýynsha, búginge deıin izdestirý-qutqarý jumystary barysynda 45 kenshiniń máıiti, boljamaly túrde 46 marqumnyń máıiti tabyldy. Qaza bolǵan 40 adamnyń jeke basy anyqtaldy, qalǵan altaýyn anyqtaý úshin qajetti saraptamalar júrgiziledi.
Shahta jumysyn qalpyna keltirý úshin ken qazbalaryn tekserý jáne jekelegen ýchaskelerde sýdy sorý jumystary júrgizilip jatyr.
«Apattyń sebepterin anyqtaý úshin men jáne Úkimet komıssııasynyń músheleri shahtaǵa tústik. Biz óte kóp buzýshylyqty anyqtadyq. 15-ten astam oqshaýlaǵysh kópir qıraǵan. Jeldetý qurylymdary jaramsyz», dedi mınıstr.
Qazirgi tańda jeti shaǵyn komıssııa qurylyp, jumys istep jatyr. Isti tergeýge Qazaqstannyń jáne alys-jaqyn shetelderdiń sarapshy uıymdary da tartyldy.
Esterińizge sala keteıik, 28 qazan kúni saǵat 02:33-te Qaraǵandy oblysyndaǵy «ArselorMıttal Temirtaý» kompanııasyna tıesili Kostenko shahtasynda jarylys boldy. Apat kezinde shahtada 252 adam bolǵan, 205 kenshi jer betine shyǵarylǵan.
Bas prokýratýra Kostenko atyndaǵy shahtadaǵy oqıǵaǵa qatysty qylmystyq is qozǵady. Boljam boıynsha, lavada gaz metanynyń jarylysy bolǵan.
Memleket basshysy «ArselorMıttal Temirtaý» kompanııasymen ınvestısııalyq yntymaqtastyqty toqtatýdy tapsyrdy.
Qazir «ArselorMıttal Temirtaý» AQ qarasty 8 shahtanyń jumysy toqtatyldy.