Búgin Túrki memleketteri uıymynyń 10-shy sammıtinde Qazaqstan Prezıdenti Qasym-Jomart Toqaev Palestınaǵa gýmanıtarlyq kómek retinde 1 mıllıon dollar bólý týraly sheshim qabyldaǵanyn aıtty, dep habarlaıdy Egemen.kz.
Memleket basshysy soltústikte Reseı men Ýkraına, Taıaý Shyǵysta Izraıl men Palestına arasyndaǵy qaqtyǵys jalǵasyp jatqanyn, Aýǵanstandaǵy turaqsyzdyq jaǵdaıyn, al Batysta zańsyz kóshi-qon problemasy ýshyǵyp bara jatqanyn eske saldy.
«Búgingi tańda Gaza sektoryndaǵy beıbit turǵyndar, ásirese balalar men qarttar qaqtyǵystyń qurbanyna aınaldy. Olardyń qaýipsizdigin qamtamasyz etý basty mindet. Osyǵan baılanysty men Palestına halqyna gýmanıtarlyq kómek 1 mıllıon dollar bólý týraly sheshim qabyldadym», dedi Qasym-Jomart Toqaev.
Onyń aıtýynsha, ondaǵan jyldar boıy sheshimin tappaı kele jatqan ózekti máselelerdi zorlyq-zombylyq pen lańkestik áreketter arqyly sheshýge múldem jol bermeý kerek.
«Qazaqstan mundaı ádisterdi úzildi-kesildi aıyptaıdy. Jaǵdaıdyń shıelenisýi aýyr zardaptarǵa ákelýi múmkin. Osyǵan baılanysty biz kez kelgen qaqtyǵystardy tek beıbit kelissózder men dıplomatııalyq dıalog arqyly sheshýge shaqyramyz», dedi el Prezıdenti.