Memleket basshysy Qasym-Jomart Toqaevtyń reseılik «Izvestııa» gazetine bergen suhbatynda eki eldiń yntymaqtastyqqa negizdelgen saıası, ekonomıkalyq baılanysy tereńdeı qamtyldy. Gazet tilshisi Prezıdentten munaı-gaz salasyndaǵy iri ınvestısııalyq jobalardyń júzege asýyn da surady. О́zbekstan Reseıdiń gazyn Qazaqstan aýmaǵy arqyly tasymaldaý jobasy iske qosyldy. Eki eldiń arasyna dánekerlik ornatýdyń mańyzdylyǵyn Q.Toqaev tarqata aıtty.
«Gaz salasy memleketterimizdiń ornyqty áleýmettik-ekonomıkalyq progresinde erekshe ról atqarady. Sondyqtan Reseıdiń kógildir otynyn tasymaldaý isi jobaǵa qatysýshy barlyq taraptyń múddesine saı keledi. 7 qazanda iske qosylǵan bul joba Qazaqstannyń gaz tasymaldaý ınfraqurylymyn keńeıtýge jáne jańǵyrtýǵa, Ortalyq Azııanyń aımaqtyq turaqtylyǵy men energetıkalyq qaýipsizdigin nyǵaıtýǵa, elderimizdiń óndiristik damýyna, bıznes-ahýaldy jaqsartýǵa, sondaı-aq azamattardyń turmys deńgeıin arttyrýǵa tyń serpin beredi. Biz ózimizdiń tranzıt áleýetimizdi tolyqqandy paıdalanýǵa múddelimiz jáne Reseı gazyn tasymaldaý kólemin odan ári ulǵaıtýǵa daıynbyz. Bıyl 1 qarashada ótken Halyqaralyq gaz forýmynda Qazaqstan Úkimeti men «Gazprom» arasynda Strategııalyq yntymaqtastyq týraly kelisimge qol qoıyldy. Bul – 15 jylǵa deıingi kezeńdi qamtıtyn ózara tıimdi seriktestik josparyn ázirleýge jáne júzege asyrýǵa baǵyttalǵan uzaqmerzimdi qujat. Qazaqstan men Reseıdiń munaı salasyndaǵy yntymaqtastyǵy burynnan tabysty damyp keledi. Elimizde «Lýkoıl» jáne «Tatneft» sııaqty reseılik konsernder jemisti jumys istep jatyr», dedi Prezıdent.
Memleket basshysy osy jyldyń aqpan aıynda «QazMunaıGaz» ben «Lýkoıl» Kaspıı teńiziniń elimizge tıesili bóligindegi «Qalamqas teńiz», «Hazar», «Áýezov» ken oryndaryn ıgerý jobasy boıynsha birqatar kelisim jasaǵanyn da aıtty. Byltyr polıpropılen óndiretin 10 iri kásiporynnyń sanatyna kiretin «Kazakhstan Petrochemical Industries (KPI)» munaı hımııasy kesheniniń qurylysy aıaqtaldy. Bul jobaǵa reseılik «Sıbýr» kompanııasy da qatysady. Memleket basshysy suhbatynda 2022 jyly Saran qalasynda «Tatneft» kompanııasynyń qatysýymen avtomobıl dóńgelekterin shyǵaratyn «KamaTyresKZ» zaýyty salynǵanyn aıtty.
Eki memlekettiń syrtqa munaı tasymaldaýda da ózara yntymaqtastyǵy joǵary. Máselen Qazaqstan munaıynyń 80 paıyzǵa jýyǵy syrtqy naryqqa Reseıdiń aýmaǵy arqyly (Kaspıı qubyr jelisi konsorsıýmy) eksporttalatynyn aıtty. Reseı de Qytaıǵa jóneltetin munaıyn Qazaqstan aýmaǵy arqyly ótkizedi. Memleket basshysy 2033 jylǵa deıin Reseıdiń 100 mıllıon tonnadan astam munaıyn tasymaldaý josparlanyp otyrǵanyn jetkizdi.