Almatyda ótken WKF karateden jasóspirimder men jastar arasyndaǵy XXI Azııa chempıonatynda elimizdiń sportshylary 8 altyn, 5 kúmis, 11 qola medal oljalady, dep habarlaıdy Egemen.kz Týrızm jáne sport mınıstrligi Sportty damytý dıreksııasynyń baspasóz qyzmetine silteme jasap.
Azııa qurlyǵynyń 30-ǵa tarta elinen jınalǵan 600 sportshy aıqasqa tústi. Jalpykomandalyq esepte Japonııa karateshileri 14 altyn, 5 kúmis, 4 qola medalmen kósh bastasa, Qazaqstan sportshylary ekinshi satyǵa ornyqty. Úshtikke Iran quramasy ilinip, 5 altyn, 6 kúmis, 11 qola júldeni enshiledi.
Sońǵy jyldary sporttyń osy túri elimizde órken jaıyp, qarqyndy damyp keledi. Qazan aıynda karateden eresekter arasyndaǵy álem chempıonaty Majarstanda ótti. Dúnıejúzilik dodada Móldir Jańbyrbaı (50 keli) qazaq sportynyń tarıhynda osy sport túrinen tuńǵysh álem chempıony atanyp, Ánuranymyzdy shyrqatqan bolatyn.