Beıjińde «О́rkenıetter qarym-qatynasy jáne jahandyq damý» forýmy ótti. Forým aıasynda Qytaı men Ortalyq Azııa elderi memlekettik basqarý akademııalary arasyndaǵy yntymaqtastyq jelisi quryldy. Ony qurý týraly Qytaı ulttyq memlekettik basqarý akademııasy bastama kótergen, dep habarlaıdy Egemen.kz.
«Jeli memlekettik qyzmetshilerdi daıarlaý jáne oqytý salasyndaǵy yntymaqtastyqqa jańa serpin beredi, demek, jalpy elderdi modernızasııalaýǵa yqpal etetin bolady», dedi Astana Memlekettik qyzmet haby Basqarýshy komıtetiniń tóraǵasy Alıhan Baımenov.
Jeliniń quryltaıshy-músheleri – Qazaqstan, Qyrǵyz Respýblıkasy, Tájikstan, Túrikmenstan jáne О́zbekstandaǵy memlekettik basqarý akademııalary.
Jalpy, Qytaı Ulttyq memlekettik basqarý akademııasy bastamasymen ótken órkenıetaralyq kommýnıkasııa men jahandyq damý forýmy jumysyna Eýropa, Amerıka, Afrıka, Taıaý Shyǵys jáne Ortalyq Azııanyń 30-dan astam elinen úkimet músheleri, iri saıası qaıratkerler, halyqaralyq uıym basshylary men taldaý ortalyqtary sarapshylary qatysty.
Plenarlyq sessııada Qytaı Kompartııasy joǵary partııa mektebi (Qytaı Ulttyq memlekettik basqarý akademııasy) atqarýshy vıse-prezıdenti Sı Chýntao, Jańa damý banki prezıdenti jáne Brazılııanyń eks-prezıdenti Dılma Rýsseff, Brýkıng ınstıtýtynyń qamqorshylyq keńesiniń tóraǵasy Djon Tornton (AQSh), Belgııanyń burynǵy premer-mınıstri Iv Leterme, Astana Memlekettik qyzmet haby basqarýshy komıteti tóraǵasy Alıhan Baımenov jáne basqa da birqatar halyqaralyq sarapshy sóz sóıledi.
Sı Chýntao turaqty ári úılesimdi álemdik damý úshin túrli órkenıetter arasyndaǵy qarym-qatynas pen yntymaqtastyqty damytýdyń, dıalog pen ózara túsinistikti nyǵaıtýdyń mańyzdylyǵyn atap ótti.
О́z sózinde Alıhan Baımenov adam tabıǵatyna tán izdenimpazdyq, jańashyldyq, tanym kókjıegin keńeıtýge umtylys órkenıet damýyna árdaıym serpin berip kelgenin aıtty. Al ǵasyrlar boıy Konfýsıı, Ál-Farabı, Abaı sekildi oıshyldar adamzatqa ortaq qundylyqtarǵa negizdelgen orta qurýǵa úndeý arqyly ǵylymı-tehnıkalyq progress jemisterin adam ıgiligine jumsaýǵa beıim ahýal qalyptastyrýǵa úles qosqanyn atap ótti. Adam tabıǵatyna tán qaýymdasýǵa, qarym-qatynas aıasyn, ortasyn, áriptestik keńistigin keńeıtýge umtylys ta órkenıet damýy tetigi bolǵanyn tilge tıek etti.
Máselen, ony Myńjyldyqtyń damý maqsattary, Turaqty Damý Maqsattary, sondaı–aq «Bir beldeý-bir jol» bastamasy jáne ortaq taǵdyrly Ǵalamdyq qaýymdastyq tujyrymdamasy sııaqty ǵalamdyq bastamalardan kórýge bolady. Olar adamzat progresi úshin árbir eldiń turaqty damýy men áleýetin arttyrý boıynsha jahandyq orta qalyptastyrýǵa baǵyttalǵanyn aıtty. «Bul turǵyda júıeli tájirıbe men bilim almasý, onyń ishinde búgingi forýmdar sııaqty jıyndar - jahandyq dıalogty baıytýdyń óte mańyzdy quraly», dedi Baımenov.
Forým aıasynda Ortalyq Azııa óńiri ókilderi QKP Ortalyq partııa mektebi (Qytaı Ulttyq memlekettik basqarý akademııasy) atqarýshy vıse-prezıdenti Sı Chýntaomen kezdesip, pikir almasty.
Kezdesý barysynda Alıhan Baımenov pen Qazaqstan, Qyrǵyzstan, Tájikstan, Túrikmenstan jáne О́zbekstan memlekettik basqarý akademııalary basshylary kadrlardy daıarlaý jáne qaıta daıarlaý salasyndaǵy yntymaqtastyq perspektıvalary týraly óz oılaryn ortaǵa saldy.
Sonymen qatar Baımenov Qytaıdaǵy memlekettik basqarý reformalaryna arnalǵan Hab jýrnalynyń arnaıy shyǵarylymyn usynyp, Habtyń qatysýshy elderi men seriktesteriniń osy basylymǵa qyzyǵýshylyǵy men suranysyn atap ótti.