Búgin Qazaqstan Úkimeti men Qytaı Halyq Respýblıkasynyń Úkimeti arasyndaǵy vızalyq talaptardan ózara bosatý týraly kelisim kúshine endi, dep habarlaıdy Egemen.kz Syrtqy ister mınıstrliginiń baspasóz qyzmetine silteme jasap.
Osy kelisimniń 1-shi babyna sáıkes eki eldiń azamattary jeke isterdi, týrızmdi, em qabyldaýdy, halyqaralyq tasymaldardy, tranzıttik, sondaı-aq iskerlik maqsattardy júzege asyrý úshin vızalyq talaptardan bosatylady. Osy rette azamattardyń eki memleket aýmaǵynda bolý merzimi kúntizbelik 30 (otyz) kúnnen aspaıtyn merzimdegi kezeńge, al kúntizbelik 180 (júz seksen) kún ishinde jıyntyǵynda kúntizbelik 90 (toqsan) kúnnen aspaýy qajet.
Azamattarda 30 kúnnen artyq bolý qajettiligi bolǵan jaǵdaıda, tıisti sanattaǵy kirý vızasyn aldyn ala rásimdeý qajet. Vızasyz rejim jumysqa ornalasýǵa, oqýǵa jáne mıssıonerlik qyzmet atqarýǵa quqyq bermeıdi.
Joǵaryda atalǵan kelisim QHR Gonkong jáne Makao arnaıy ákimshilik aýdandarynyń aýmaǵyna barýǵa qoldanylmaıdy. Qazaqstan azamattary Gonkongqa vızasyz 14 (on tórt) kúnnen aspaıtyn merzimge bara alady, al Makaoǵa barý úshin vıza rásimdeý qajet.
Qazaqstandyqtar 34 elge vızasyz bara alady. Atalǵan elderdiń tizimimen myna silteme arqyly tanysýǵa bolady.