Tanymal akter, ázil-syqaqshy Qaırat Ádilgereı kıno túsirip, mol tabysqa kenelgenin aıtty, dep habarlaıdy Egemen.kz.
Ol sybaılas jemqorlyq týraly fılmniń birinshi, ekinshi bólimderin kórermen jyly qabyldaǵanyn atap ótti. “Juldyzdy shańyraq” baǵdarlamasyna bergen suhbatynda ártis osy fılmniń úshinshi bólimine daıyndalyp jatqanyn jetkizdi.
“Úshinshi bólimin túsirgennen keıin jemqorlyq taqyrybyn qozǵamaımyz. Ári bul bólimde komedııa elementteri kóp bolmaıdy. Negizinen statıstıkaǵa mán beremiz. Odan keıin kıno jelisi jemqorlyqtyń kesirinen bolǵan oqıǵalarmen órbıdi. Bul kıno da shetelde túsiriledi. Qańtar aıynda jobamyzdy bir pysyqtap, shetelge jol júremiz”, dep josparyn aıtty.
Akterdyń aıtýynsha, fılmniń ekinshi maýsymy kóńilden shyqqan. Tipti kórermen qyzyǵýshylyǵy erekshe bolǵany sondaı, ár óńirden bılet surap habarlasqandarda esep bolmady.
“Ádettegideı komedııa janryndaǵy fılmniń biri bolady dep oıladyq. Alaıda bul týyndy biz oılaǵannan da keremet tabysty boldy. Bir aptada 1 mıllıon AQSh dollaryn jınady. Kınoteatrda 58 kún úzbeı kórsetildi. Osyǵan deıin qanshama kıno kórsetilip jatsa da, 58 kún boıy anshlag buryn-sońdy bolmapty. Otandyq kınoındýstrııada mıllıarder bolǵan Nurlan Qoıanbaevtan keıin biz ekinshi orynǵa jaıǵastyq. Jalpy, bizdiń ssenarıst pen rejısser halyq kóńilinen shyǵatyn keremet týyndy jasaǵanyn aıta ketken jón”, deıdi akter.
Akter alǵashqy prodıýserlik debıýtinde tipti oıyna kirip-shyqpaǵan qomaqty qarajat jınalǵanyna áli kúnge deıin tańdanady eken.
“Kórsetilim bitkennen keıin kassany sanaǵanda 1 mıllıard 81 mıllıon teńge túsipti. Kıno túsirý úshin ınvestor taýyp, sodan aqsha alǵan edik, eń birinshi sony qaıtardyq. Jarnama men kınoteatrdyń ákimshiligimen eseptestik. Qanat Áljapparov ekeýmiz bolǵasyn qolymyzdaǵy 30 mıllıondy teńdeı etip bólip aldyq. Toǵyz aı boıy tókken terdiń aqysy osylaı aqtaldy. Qazir halyqtyń talǵamy ózgerip ketti. Ishki nıetiń aqsha jasaý bolyp, arzanqol dúnıe usynsań kórermenge ótpeı qalýy múmkin. Halyq talǵamynyń óskenin baıqadym”, dep aǵynan jaryldy akter.