Artyna rýhty jyrlaryn qaldyrǵan aldaspan aqyn, el táýelsizdigin ańsaǵan aqberen batyr Mahambet О́temisulynyń esimi urpaq jadynda jańǵyra beredi. Atyraýda ór tulǵanyń týǵanyna 220 jyl tolýyna oraı «Shandoz» atty mýzykalyq-poetıkalyq ádebı kesh ótti.
«Shandoz» kompozısııasynyń basty keıipkerin belgili kúıshi, «Eren eńbegi úshin» medaliniń ıegeri Jánibek Jámıev somdady. Teatr ártisteri Mahambettiń «Tarlanym», «Joryq», «Jaýǵa shapqan», «Arysymnan aıyryldym», «О́kinish», «Kishkentaı» kúılerin oryndap, aqyn jyrlaryn oqydy. Arnaıy kórmege rýhty aqynnyń ómiri men shyǵarmashylyǵy týraly kitaptar, respýblıkalyq sımpozıýmǵa qatysqan sýretshilerdiń týyndylary qoıyldy.
Ádebı keshke arnaıy qatysqan Atyraý oblysy ákimi apparatynyń basshysy Nurlybek Jeńisbekuly, Memlekettik syılyqtyń laýreaty, Qazaqstannyń halyq ártisi Tuńǵyshbaı Jamanqulov, belgili jazýshy Jumabaı Shashtaıuly, aqyn, halyqaralyq «Alash» ádebı syılyǵynyń laýreaty Marjan Ershý Mahambet muralary haqyndaǵy oıymen bólisti. Daýylpaz aqynnyń oı-armanynan, jan saraıynan, ishki tanymy men tolǵanysynan týǵan óleń-jyrlary áýelegen sahnalyq qoıylym kórermendi beıjaı qaldyrmady.
Jazýshylar odaǵy Atyraý oblystyq fılıalynyń dırektory, aqyn Álııa Dáýletbaevanyń aıtýynsha, ádebı kesh el táýelsizdigin ańsap, jalyndy jyrlarymen el jadynda saqtalǵan aqynnyń shyǵarmalaryn nasıhattaý maqsatynda uıymdastyrylǵan.
«Qazaqta uly tulǵalar az emes. Al Mahambet О́temisuly – óz dáýiriniń biregeı tulǵasy. Sol sebepten, batyr ári aqynnyń týǵanyna 220 jyl tolýyna oraı ótken «Shandoz» atty ádebı is-sharada onyń kúıleri men jyrlarynyń kópshiligi qamtyldy. Bir sózben aıtqanda, ónerdiń sımbıozyn jasaýǵa tyrystyq», deıdi Á.Dáýletbaeva.
Elimizdiń ár óńirinde Mahambet О́temisulynyń esimi oqý oryndary men kóshelerge, ózge de nysandarǵa berilgen. Al Atyraýdaǵy qazaq akademııalyq drama teatry ór tulǵanyń esimimen atalady.
Atyraý oblysy