Balalardyń quqyqtaryn qorǵaýda mektepter men joǵary oqý oryndary tize qosyp, Astana qalasynda «Meniń baýyrym» stýdenttik volonterlik jobasyn qolǵa aldy, dep habarlaıdy Egemen.kz.
«Oqý-aǵartý mınıstrligi men Ǵylym jáne joǵary bilim mınıstrligi «Meniń baýyrym» eriktiler jobasyn iske asyrý týraly ekijaqty kelisimge qol qoıdy. Birlesken qujat balalardyń quqyqtaryn qorǵaýǵa jáne balalarǵa qatysty jobalardy tıimdi basqarýǵa, mektep oqýshylarynyń qolaıly ári qaýipsiz ortada bilim alýyna qolaıly jaǵdaı jasaýǵa baǵyttalǵan. Oqý-aǵartý mınıstri Ǵanı Beısembaev balalardyń qaýipsizdigin qamtamasyz etý memlekettiń mańyzdy mindeti bolyp qala beretinin atap ótti. Bul baǵytta vedomstvo birqatar sharalar qabyldaýda. Onyń ishinde áleýmettik jobalardy júzege asyrý baǵyty da bar.
«Halqymyzdyń «Asar» degen ıgi dástúri bar. Iаǵnı, birlesip, erikti túrde jumyla kómektesýdi bildiredi. Volonterlik - osy ulttyq jáne jalpyadamzattyq qundylyqtardyń tikeleı kórinisi. Eriktiler óz eliniń naǵyz patrıoty men azamaty retinde balalardy jaqsylyqqa, ádildikke, jasampazdyqqa jetelep, shyǵarmashylyq shabyt beredi dep senemiz. «Meniń baýyrym» eriktiler qozǵalysy balalarymyzdyń quqyqtaryn qorǵaý baǵytyndaǵy yntymaqtastyǵymyzdy nyǵaıta túseri sózsiz», dedi Oqý-aǵartý mınıstri Ǵanı Beısembaev.
Bul jobanyń qataryna pedagogıka, quqyqtaný, psıhologııa, áleýmettik pedagogıka jáne aqparattyq tehnologııalar mamandyqtary boıynsha 3-5 kýrstarda oqıtyn JOO stýdentteri tartylmaq. Elordanyń 171 mektebiniń oqýshylaryna qoldaý kórsetetin 12 joǵary oqý ornynyń 1300 stýdentinen turatyn komanda qurý josparlanyp otyr.
«Qurmetti stýdentter, qazirgi sát - ómirlerińizdiń altyn kezeńi. О́zderińizdiń resýrstaryńyzdy jan-jaqty damýǵa: oqý, ǵylym, áleýmettik jáne qoǵamdyq ómirge baǵyttaıtyn ýaqyt. AQSh-ta «Community service», ıaǵnı «Qoǵamdyq qyzmet» degen pán bar. Elimizdegi joǵary oqý oryndarynda da ol engizilýde. 6 ýnıversıtte biz birinshi kezekte pılottyq jobany iske qostyq. Bul oqý oryndarynda 100% akademııalyq kórsetkishtermen ólshenetin GPA-di biz kelesideı bóldik: 50% – akademııalyq kórsetkish, 25%-ǵylymı-zertteý qyzmeti jáne 25%-qoǵamdyq-áleýmettik jumys. Iаǵnı, ár stýdenttiń áleýmettik qyzmeti: volonterlik, sport, áleýmettik, mádenı jobalary da esepteledi. Jalpy kórsetkishtiń 25% - na qosylady. Sondyqtan «Meniń baýyrym»jobasyn iske qosý - búkil qoǵamǵa paıdasy tıetin ıgi bastamanyń jalǵasy dep sanaýǵa bolady. Bizdiń balalarymyzdyń ál-aýqatynyń jaqsy bolýy - memlekettiń ıgiligi», ekenin aıtty Ǵylym jáne joǵary bilim mınıstri Saıasat Nurbek.
«Meniń baýyrym» jobasynyń eriktileri aldymen arnaıy trenıngterden ótip, mektepterde balalarmen jáne jasóspirimdermen jumys isteý jóninde tálim alady. Olardyń ári qaraıǵy jumysy patrıottyq jáne ekologııalyq tárbıe berý, jaýapkershilikti arttyrý, mektepishilik qarym-qatynastardy nyǵaıtý, emosıonaldyq ıntellektini, quqyqtyq, oqyrmandyq, qarjylyq jáne IT saýattylyqty damytý jónindegi mańyzdy baǵyttardy qamtıdy.
Volonterlik toptyń músheleri joǵary oqý oryndary stýdentterinen jasaqtalsa, Astana qalasy bilim basqarmasy olardyń mektepterdegi jumysyn uıymdastyrýǵa qoldaý kórsetedi.