Fýtboldan Qazaqstan ulttyq quramasy kelesi jyly ótetin Eýropa chempıonatyna irikteý aıasyndaǵy aqyrǵy matchty ótkizý úshin Slovenııaǵa attandy, dep habarlaıdy Egemen.kz Qazaqstan fýtbol federasııasynyń baspasóz qyzmetine silteme jasap.
Magomed Adıev baptaıtyn ulttyq qurama 20 qarasha kúni syrt alańda Slovenııa quramasyna qarsy oınaıdy. Sheshýshi týrda jigitter jeńiske jetse, keler jyly Germanııa tórinde Eýropa chempıonatynyń dýyna qosylady.
N tobynda Qazaqstan quramasy 18 upaımen 3-satyda tur. Top basynda 22 upaı jınaǵan Danııa fýtbolshylary Eýropa chempıonatyna joldamany enshilep qoıdy. Al Slovenııa fýtbolshylary enshisindegi 19 upaıymen ekinshi satyǵa ornyqty. Olar óz alańynda Qazaqstan quramasyn utpaı-aq teń nátıjeniń ózin qanaǵat tutatyny belgili. Al bizdiń jigitterge jeńis aýadaı qajet. О́kinishtisi, ulttyq quramanyń kapıtany Ashat Taǵybergen men surmergen Baqtıer Zaınýtdınov jaraqaty jazylmaýy sebepti mańyzdy matchqa qatysa almaıdy. Ulttyq quramanyń mańyzdy oıynyn «Qazsport» telearnasy 20 qarashanyń túninde 01:35-te tikeleı efırde kórsetedi.