Jeńis pen úmit syılaǵan kún

Oıyn barysynda tóreshi ysqyryǵy estilgen bette San-Marıno oıynshylary shabýylǵa birden lap qoıdy. Mundaıdy kútpegen alań qojaıyndary birese dopty aýtqa tepse, birese jáı ǵana qarsylastar alańyna asyrýmen boldy. Alaıda fýtbolshylarymyz tez arada esin jıyp, shabýylǵa kóshti.

Abat Aıymbetov bastaǵan oıyn­shylar birneshe ret shabýyldaǵanymen barlyǵy da nátıjesiz aıaq­taldy. Áıt­kenmen, 19-mınýtta el fýt­bol­shylary degenderine jetti. Alek­­sandr Zýev (Qazaqstan) aıyp ala­ńynyń buryshynan joıqyn soqqy jasap edi, sanmarınolyq qaqpashy Elııa Benedettını «seıv» jasap, dopty aıyp alańynyń syrtyna shyǵaryp jiberdi. Alaıda dop Islam Chesnokovtyń aıaǵynan tabyla ketti. Islam kóp oılanbaı sol aıaqpen shirene teýip, Qazaqstandy alǵa shyǵardy. Osy goldan keıin birinshi taımda Magomed Adıev shákirtteri qansha shabýyldaǵanymen, esep ózgerissiz qaldy. Taımnyń sońynda A.Zýev joıqyn soqqy jasaǵan, bul jerde San-Marıno qaqpashysy keremet «seıv» jasady.

Ekinshi taımda jer­lesterimiz shabýyldy údetti. Sondaı urymtal sátterdiń birinde Islam Chesnokov qaqpaǵa taǵy da alystan soqqy jasap, gol soqty. Osy goldan keıin Magomed Adıev úsh birdeı oıynshyny almastyryp, esepti ustap turǵysy keldi. Alaıda Sımone Franchosı qorǵaýshylarymyz men qaqpashymyz jibergen qatelikti paıdalanyp, esepti qysqartyp úlgerdi – 2:1.

Osy dál soqqydan keıin kapıtan Abzal Beısebekov bastaǵan fýtbolshylar birden ózderine kele almaı, alańda kóp qatelesti. Sheshim qabyldaýǵa asyqpaı júrip aldy. Tipti San-Marıno deńgeıine túsip ketkendeı kórindi bizge. Abyroı bolǵanda, oıyn sońynda aýstrııalyq Harald Lehner VAR júıesi arqyly penaltı taǵaıyndap, ony Abat Aıymbetov sátti oryndap shyqty. Esep – 3:1, Qazaq­stan quramasy Eýro-2024-ke shyǵý jolyndaǵy básekeni jalǵastyrý múmkindigine ıe boldy.

Dál osy kúni N tobynda óner kór­setetin Danııa quramasy Kopen­gagende Slovenııa quramasyn 2:1 ese­bimen jeńip, Eýro-2024 dodasy jol­damasyna ıe boldy. Endi toptaǵy ekinshi joldama úshin 20 qarashada Slovenııa astanasy Lıýblıanada Slo­venııa (19 upaı) men ­­­­­Qazaqstan (18 upaı) quramalary baq synaıdy. Bizge tek jeńis kerek. Slovenııany teń oıyn da qanaǵattandyrady.

 

Magomed Adıev, Qazaqstan quramasynyń bas jattyqtyrýshysy:

– Jankúıerlerge alǵysymyz sheksiz. Bul – shynymen úlken qoldaý. Ulttar lıgasynan bastaǵan jolymyz áli esimde. Qarsylasymyz Ázerbaıjan bolyp edi. Sol kezde stadıon meniń shashym sııaqty bolǵan (kúledi – red.). Qaraý-qaraý kórermen otyryp edi. Al qazir eń úlken qurama komandanyń birimen oınamasaq ta, eki táýlik ishinde bılettiń bári satylyp ketken. Onyń ústine taǵy bılet surap jatyr. «Tym bolmaǵanda bir bılet berińdershi» dep suraýshylar da kóbeıgen. Munyń barlyǵy – biz úshin qymbat dúnıe, – dedi ol.

Bas jattyqtyrýshy jankúıerlerdiń adaldyǵyna da rıza ekenin atap ótti.

– Kórermenderdiń qarsylas komandalardyń juldyzdaryn kórýge emes, óz quramasyn qoldaýǵa kele bastaǵanyn kórip júrmin. Bul – úlken jetistik. Osyndaı mártebeni ustap turý biz úshin shynymen de abyroı. Sizderge kóp rahmet, – dedi Magomed Adıev.

Sondaı-aq ol komanda kóshbasshylarynyń biri Ashat Taǵybergenniń oıynǵa aralaspasa da qurama sapynda júrgenine baılanysty pikir bildirdi.

– Men Ashatqa bizdiń qasymyzda júr dep aıttym. Slovenııaǵa da alyp baramyz. О́ıtkeni bizge onyń alańda ǵana emes, onyń syrtynda da birge bolǵany mańyzdy. Bahamen (Baqtıer Zaınýtdınov – red.) de osyndaı áńgime boldy. Ol osy oıynǵa kelmek bolǵan. Biraq dárigerler jaraqaty aýyr bolǵandyqtan, ushpaýǵa keńes beripti. Slovenııaǵa ushyp keletin shyǵar dep úmittenemiz. Osylaısha, birligimizdi pash etkimiz keledi, – dedi jattyqtyrýshy.

Magomed Adıev ulttyq quramanyń osyǵan deıingi jeńisterinde búkil ujymnyń eńbegi jatqanyn aıtty.

– San-Marıno komandasynan qandaı eseppen basym túskenimiz mańyzdy emes. Mańyzdysy – 3 upaı. Bul – jalǵyz Adıevtiń nemese jekelegen oıynshylardyń fenomeni emes. Bul – búkil quramanyń fenomeni. Onyń syrtynda federasııanyń eńbegi bar, – dedi ol.

 

Dereknama:

Qazaqstan men San-Marıno oıynyn álemniń 36 elinde AQSh, Qytaı, Meksıka, Ispanııa, Fransııa, Indonezııa, Sıngapýr, Reseı, Túrkııa syndy memlekette tikeleı efırde kórsetti. Qazaqstan men San-Marıno kezdesýine bas tóreshi qyzmetin aýs­trııalyq Harald Lehner at­qardy. Oǵan otandastary Andreas Haı­denraıh pen Stefan Pıhler kómek­shilik jasaıdy. Qosalqy tóreshi de – aýstrııalyq Sebastıan Gıshamer. Qazaqstan men San-Marıno oıynyn 30 100 adam jankúıerlik tanytty. Buǵan deıin jankúıer eń kóp jınalǵan oıyn Qazaqstan – Fınlıandııa kezdesýinde tirkelip, sol joly 30 019 jankúıer ulttyq quramaǵa qoldaý bildirgen edi. Magomed Adıev Qazaqstan quramasy tizginin ustaǵaly onynshy jeńisine qol jetkizdi. Reseılik maman Qazaqstan quramasynyń bas bapkeri retinde alǵashqy oıynyn 2022 jyly 3 maýsymda Astanada, Ulttar lıgasy oıyny aıasynda Ázerbaıjan quramasyna qarsy (2:0) ótkizdi. Qazaqstan quramasynyń je­ńisteri boıynsha rekordqa qol jet­kizgen bapkerler: 1. Magomed Adıev – 10 jeńis (17 match); 2. Arno Paıpers – 7 jeńis (36 match); 3. Serik Berdalın – 6 jeńis (20 match); 4. Voıt Talgaev – 5 jeńis (9 match); 5. Mıhal Bılek – 5 jeńis (18 match); 6. Mıroslav Beranek – 5 jeńis (24 match).