Reseı Federasııasynyń Kemerovo oblysyna 2018 jylǵa deıin - 20 jyl boıy gýbernator bolǵan Aman Tóleev 80 jasqa qaraǵan shaǵynda baqılyq boldy, dep habarlaıdy Egemen.kz.
Qaraly habardy aımaqtyń qazirgi basshysy Sergeı Sıvılev VKontakte jelisindegi paraqshasynda málimdedi.
«1997-2018 jyldar aralyǵynda Kemerovo oblysynyń gýbernatory bolǵan, bar ómirin Kýzbass pen Reseıge qyzmet etýge arnaǵan erekshe tulǵa Aman Ǵumyruly Tóleev dúnıeden ótti. Bul orny tolmas qaza boldy. О́ńirimizdiń tynys-tirshiligindegi tutas bir dáýir Aman Ǵumyrulymen baılanysty: ol qıyn-qystaý kezeńde óńirdi basqaryp, daǵdarystan shyǵara bildi.
Kýzbastyqtar Aman Tóleevti óz qyzmetinde árqashan halyq múddesin birinshi orynǵa qoıatyn naǵyz halyqtyq gýbernator retinde eske alady», - dep jazdy reseılik sheneýnik.