Astanada bokstan VI jazǵy Spartakıada máresine jetti. Boksshylardyń áleýeti synǵa túsken dodaǵa álem chempıondary, álem birinshiliginiń júldegeri, Azııa chempıony, jazǵy Olımpıada oıyndarynyń júldegeri atanǵan sańlaqtar da synǵa tústi. Ulttyq quramanyń bas bapkeri Myrzaǵalı Aıtjanovtan Spartakıadaǵa qatysty paıymyn suradyq.
– О́zińiz de tamashaladyńyz, básekelestik qalaı órbidi? Jastardyń tegeýrini qanshalyqty eken?
–Jazǵy Spartakıada dodasynda jastar óziniń áleýetin kórsetti. Ár salmaqta júlde alǵan boksshylar ulttyq quramanyń sapyn nyǵaıtyp, keler kúnniń enshisindegi dodalarǵa ázirlikti kúsheıtemiz. Alda bolar alamannyń basty báıgesi árıne Parıj jazǵy Olımpıadasy. Soǵan joldama oljalaý, odan keıin medal ıelenýge ázirlik júrgizý, Olımpıada rınginde ne bel ketkenshe, ne belbeý úzilgenshe aıqasý. Maqsat osy.
– Apta boıy Astana tórinde aıqasqa túsken boksshylardyń arasynda Soltústik Qazaqstan oblysynyń atynan birde-bir sportshynyń bolmaýy, ıaǵnı bul oblystyń komanda ákelmeýi, ózge óńirlerdiń keıbiri tipti tolyq quramda qatyspaýy jaıynda ne aıtasyz? Jazǵy Spartakıada oıyndary 4 jylda bir aınalyp keledi ǵoı ózi.
– Árıne, qynjylasyń, elimizde buqaralyq sıpat alǵan sport túri boks deımiz. Soǵan qaramastan Soltústik Qazaqstan oblysynan sportshy qatyspaýy osy salaǵa jaýapty mamandardyń da jumysyna atústi qaraýynyń kesiri der edim. Bir oblystyń komanda ákelmeýi, óziń aıtpaqshy, ózge óńirlerdiń de keıbiri tolyq quramda kelmeýi qadirińdi qashyrady eken. Túrkistan, Jambyl oblystary men Almaty qalasy ǵana tolyq quramda qatysyp, ár salmaqta boksshy qosty. О́zge óńirler men Shymkent, Astana syndy megapolısterdiń de komandasy tórt kózi túgel bolǵan joq. 4-5 boksshymen ǵana kelgen oblystyń komandasy bar. Ár nárseniń qaıyry bar deımiz ózimizdi jubatyp. Qatysýshylardyń sany jaǵynan uıatty bolǵanymyzben de sapany salmaqtaıtyn bolsaq, kóńil toıady. О́ıtkeni joǵaryda aıtqanymdaı, álem chempıondary, álem birinshiliginiń fınalyna shyǵyp kúmis medal oljalaǵan, Azııa chempıonatynda top jarǵan, tipti kásipqoı boksqa ketip, áleýetin baıqap júrgen boksshylar da bıylǵy Spartakıadaǵa qosyldy.
– Álem chempıony demekshi, olımpıadalyq salmaqta 5 birdeı álem birinshiliginen altyn medal oljalaǵan boksshy qatysty. Olardyń tórteýi ózara fınalda toqaılasty.
– Jankúıerlerdiń kóz aldynda, kórermender telearnadan tikeleı efırden tamashalady. Tóreshilik te ádil boldy, bura tartsa, obal-saýaby ózderine tıetinin sezindi dep paıymdaımyn. Ár salmaqtaǵy chempıon atanǵan boksshylar ózderiniń áleýetin kórsetti.
– Qytaıdyń Hanchjoý qalasynda ótken jazǵy Azııa oıyndaryna attanarda keminde 4 joldama enshileımiz dep edińiz. Biraq buıyrǵany 1 lısenzııa ǵana.
– Buıyrmaǵan eken, oljaly oralmaǵanymyz úshin aıypty ózimiz arqalaımyz, kináni bireýge arta salý jón emes, kem tusyńdy aldymen ózińnen izdeýge tıistisiń. Kelesi jyly Italııa elinde, sodan keıin Taılandta lısenzııalyq týrnır uıymdastyrylady, sol dodada barymyzdy salamyz.
– Osy eki alamanǵa kimderdiń baratyny Spartakıadanyń qorytyndysy boıynsha saralana ma? Chempıon atanǵan boksshylarǵa basymdyq berile me?
– Árıne olar baryn salyp, óziniń myqtylyǵyn moıyndatyp Spartakıadanyń altynyn ıelenip otyr. Nege basymdyq berilmeýi kerek? Sondyqtan chempıon atanǵan boksshylar ózderin dáleldedi. Jańa da aıttym, júldege ilingen boksshylardyń barlyǵy da ulttyq quramanyń oqý-jattyǵý jıynyna shaqyrylady. Al lısenzııalyq týrnırge kimniń baratyny jarysqa jaqyn qalǵanda ǵana naqtylanady. О́ıtkeni jaman aıtpaı jaqsy joq, jaraqat alyp qalýy múmkin, basqa da sebepteri bar.
– Jýyrda Týrızm jáne sport mınıstri Ermek Marjyqpaev ózderińizdiń esepti tyńdady. Nátıjege qatysty syn da aıtyldy. Boksshylardyń 3-raýndta alqynyp qalatynyna qynjyldy. Basqa-basqa ózi de bokspen shuǵyldanyp, KSRO sport sheberi ataǵyn alǵan mınıstr beker synamaıdy ǵoı.
– «Syn túzelmeı, min túzelmeıdi». Boksshylardyń fızıkalyq dene qýatyn shyńdaý úshin sheteldik maman da shaqyrtyp, jumysty kúsheıttik. Hanchjoýda ótken Azııa chempıonatynan keıin bul mamannyń jumysyna qatysty da az sóz ergen joq. Biraq biz aldymen ózimizden esep alyp úırensek eken. О́zbekstan boksy nege qýatty? Olardyń da ázirlik júrgizýi, oqý-jattyǵý jıynyn bizden góri ózgeshe tásilde ótedi demeımin. Biraq ulttyq quramada aýyzbirshilik, yntymaq zor. Qaı boksshysy da álem chempıony edim, Olımpıada oıyndarynda altyn aldym dep shirenbeıdi, úıine barsa, qara jumysty da isteıdi, oǵan arlanbaıdy da. Al bizde qazir ulttyq quramanyń sapynda júrgenderdiń kóbi qalanyń aqsaýsaq balasy. Keıde qaljyńǵa súıep «baıdyń balalary» dep te aıtyp qoıamyn. Sondyqtan da ata-analarǵa aıtarym balany jasóspirim shaǵynan jumsap, úıdiń sharýasyna úıretip eńbekpen eseıtý kerek. Sonda ǵana shymyr, qaısar bolyp, kúshi qataıady. Aldymen eńbek, ekinshi tártip bolǵan jerde ǵana nátıje ornaıdy. Men buǵan deıin de ulttyq quramanyń bas bapkeri laýazymyn atqardym. Taǵy da bas bapkerlik laýazymdy usyndy. Osy jyldyń qańtar aıynan bastap ulttyq quramany qabyldap aldym. Ras, moıynymyzda úlken júkteme, aýyr amanat tur, sony oryndaýǵa barymyzdy salamyz.