Memleket basshysy Mınsk qalasynda ótken Ujymdyq qaýipsizdik týraly shart uıymy Ujymdyq qaýipsizdik keńesiniń sessııasyna qatysty. Belarýs Prezıdenti Aleksandr Lýkashenkonyń tóraǵalyǵymen ótken sammıtke elimizdiń basshysymen qatar, Qyrǵyzstan Prezıdenti Sadyr Japarov, Reseı Prezıdenti Vladımır Pýtın, Tájikstan Prezıdenti Emomalı Rahmon barǵan, dep habarlaıdy Egemen.kz Aqordanyń baspasóz qyzmetine silteme jasap.
Qasym-Jomart Toqaev sessııa qatysýshylaryna iltıpat bildire otyryp, jıyndy joǵary deńgeıde uıymdastyrǵany úshin Belarýs tarapyna jáne Aleksandr Lýkashenkoǵa rızashylyq bildirdi.
Prezıdent 2024 jyldyń 1 qańtarynan bastap UQShU-ǵa tóraǵalyq etý mindeti Qazaqstan Respýblıkasyna ótetinin málimdedi. Bul rette Qasym-Jomart Toqaev Uıym aıasynda ujymdyq qaýipsizdik júıesin odan ári nyǵaıtýǵa elimizdiń eleýli úles qosýǵa daıyn ekenin jetkizdi. Osyǵan oraı Memleket basshysy Qazaqstan tóraǵalyǵy kezinde Uıym qyzmeti boıynsha erekshe nazar aýdarýdy qajet etetin birqatar basym baǵytty usyndy.
– Birinshi, UQShU-nyń qaýipsizdik salasynda múddeli eldermen jáne halyqaralyq uıymdarmen yntymaqtastyq ornatý. Birikken Ulttar Uıymymen jáne onyń qurylymdarymen arada qalyptasqan yqpaldastyq deńgeıin saqtaýǵa basa mán berýdi usynamyz. Bul jumys 2010 jyldyń 18 naýryzynda UQShU men BUU hatshylyqtary arasynda qol qoıylǵan Yntymaqtastyq týraly birlesken deklarasııa negizinde júrgiziledi. TMD men ShYU arasyndaǵy yntymaqtastyqty odan ári tereńdetýdi quptaımyz. «UQShU-nyń TMD-men jáne ShYU-men yntymaqtastyǵyn nyǵaıtý jónindegi praktıkalyq sharalar» atty qujatta onyń naqty qadamdary aıqyndalǵan, – dedi Qasym-Jomart Toqaev.
Áskerı yntymaqtastyq máseleleri boıynsha qarym-qatynas Uıym qyzmetiniń ekinshi mańyzdy baǵyty retinde usynyldy. Qazaqstan Prezıdentiniń pikirinshe, UQShU Ujymdyq kúshterin jedel áreket etý máselelerine qatysty normatıvtik-quqyqtyq bazany jetildirý qajet.
– Bul kontıngenttiń kedergisiz ári esh jerge aıaldamaı qozǵalýyna, áskerı avıasııanyń ushýyna jáne taǵy da basqa aspektilerge qatysty. Sonymen qatar áskerı kadrlardy daıarlaý júıesin jáne UQShU-ǵa múshe memleketterdiń áskerı-ǵylymı qýatyn damytýdy jalǵastyrǵan jón. Uıymnyń bitimgershilik áleýetin arttyrýǵa aıryqsha mán berý usynylady. Bul rette UQShU Bas hatshysynyń bitimgershilik máseleleri jónindegi arnaıy ókiliniń qyzmeti zor ról atqarady, – dedi Memleket basshysy.
Qasym-Jomart Toqaev óz sózinde halyqaralyq terrorızm men ekstremızmge qarsy is-qımyl baǵytyndaǵy yntymaqtastyqty damytý isin taǵy bir basymdyq retinde atady. Memleket basshysynyń aıtýynsha, ujymdyq qaýipsizdik júıesiniń terrorızmge qarsy qyzmetine jiti nazar aýdarylady.
– Lańkestik toptarǵa qosylýdy josparlap júrgen azamattarymyzdyń elden tysqary shyǵyp ketýine jol bermeý úshin birlesken jumysty jalǵastyrǵan jón. Terrorızmge jáne ekstremızmge qatysy bar adamdardy izdeý, ustaý jáne ekstradısııalaý tetikterin iske qosý mańyzdy. UQShU Qaýipsizdik keńesi hatshylarynyń komıteti janyndaǵy terrorızm men ekstremızmge qarsy kúres máselelerimen aınalysatyn sarapshylardyń Jumys tobyn jandandyrýdy usynamyz, – dedi Memleket basshysy.
Prezıdenttiń aıtýynsha, Uıym esirtki jáne psıhotropty zattardyń zańsyz aınalymyna da qarsy kúres júrgizýge tıis.
– UQShU-ǵa múshe elderdiń keńistigin osy qaýipti zattyń enýinen qorǵaý úshin birlesken is-sharalardyń tıimdiligin arttyrý qajet. Jumys retin barlyq ózekti faktordy, sonyń ishinde sıntetıkalyq esirtkiniń taralý aıasy keńeıe túskenin eskere otyryp uıymdastyrý kerek. Esirtkiniń zańsyz aınalymyna qarsy kúres júrgizetin quzyretti organdar jetekshilerinen quralǵan Úılestirý keńesi sııaqty mehanızm mańyzdy ról atqarady, – dedi Memleket basshysy.
Sonymen qatar Prezıdent qarý-jaraqtyń zańsyz aınalymymen jáne transulttyq uıymdasqan qylmystyq toptarmen kúresýdi, tótenshe jaǵdaılardyń aldyn alý jáne onyń saldaryn joıý máseleleri boıynsha yntymaqtastyqty nyǵaıtýdy, aqparattyq tehnologııa salasyndaǵy qylmystarǵa qarsy is-qımyldy ortaq jumystyń mańyzdy baǵyttary dep sanaıdy.
– Qazirgi jaǵdaıda qaýip-qaterdiń sıpaty men kıber qylmyskerler qoldanatyn qarý túrleri de tez ózgerip jatyr. Muny bizdiń negizgi quralymyz – UQShU-nyń aqparattyq tehnologııa salasyndaǵy qylmystarǵa qarsy is-qımyl jónindegi «PROKSI» operasııasyn iske asyrý kezinde eskerý kerek dep sanaımyz, – dedi Qazaqstan Prezıdenti.
Qasym-Jomart Toqaev Qazaqstannyń tóraǵalyq etý kezeńinde júzege asyrý úshin aıqyndalǵan basymdyqtar jýyq arada UQShU-ǵa múshe memleketterge joldanatynyn aıtty. Memleket basshysy Uıymǵa múshe elderdiń birlesken kúsh-jigeriniń arqasynda ujymdyq qaýipsizdik júıesin nyǵaıtý jáne ony odan ári damytý úshin keshendi jumystar jalǵasa beretinine senim bildirdi.
Sessııa qorytyndysy boıynsha birqatar qujat qabyldandy.