Qaztalov aýdany ortalyǵynda sý jańa mektep ǵımaraty paıdalanýǵa berildi. Tarıhy 150 jyldan asatyn Alma Orazbaeva atyndaǵy mektep oqýshylary samaladaı jaryq ta keń bilim uıasyna qadam basty.
Shyny kerek, mekteptiń jańa ǵımaratyn aýyl halqy kóp kútti. Burynǵy mektep úıi apatty dep tanylǵan soń, 600 oryndyq jańa ǵımarattyń qurylysy 2019 jyly bastalǵan edi. 1,5 jyl ishinde aıaqtalýǵa tıis qurylys tym sozylyp ketti. Áýeli pandemııa, keıin qymbatshylyq búıirden qysty. Oqýshylar qıyndyq kórdi. Jastar ortalyǵy, saz mektebi, kitaphana sekildi túrli mekemege bólinip oqydy. Merdigerge de ońaı bolmady. Áıteýir, abyroı bolǵanda bári jaqsylyqpen aıaqtaldy. Aýyldyń kire berisinde úsh qabatty bilim saraıy esigin aıqara ashty. Jap-jaryq bólmeler syńǵyr kúlkige, baqytty balaǵa toldy.
Jańa mekteptiń ashylý saltanatyna Qaztalov aýdanynyń ákimi Aslanbek Sarqulov, oblystyq qurylys basqarmasynyń basshysy Álibek Antazıev, oblystyq bilim basqarmasy basshysynyń orynbasary Bısenbek Nasımýllın, qurylystyń merdigeri «Jıenbaı» kompanııasynyń dırektory Aleksandr Qaraǵoıshın, Alma Orazbaevanyń týysy, Bókeı Ordasy aýdany Han ordasy aýyly Jáńgir han atyndaǵy orta mekteptiń qyzmetkeri Rınat Orazbaev bastaǵan qonaqtar, barsha aýyl turǵyny arnaıy keldi.
«Ult ustazy Ahmet Baıtursynulynyń: «Bilimdi bolýǵa oqý kerek. Baı bolýǵa kásip kerek. Kúshti bolýǵa birlik kerek. Osy kerekterdiń jolynda jumys isteý kerek», dep aıtqan qanatty sózi barshamyzdyń esimizde «Jeti túrli ilim biletin» urpaq tárbıeleý – qazirgi kúnniń negizgi mindeti. Búgingi qýanyshty jańalyq mektebimizdiń ashylǵanyna 155 jyl jáne qoǵam qaıratkeri Alma Orazbaevanyń týǵanyna 125 jyl tolýymen qatar keldi. Mektebimizdiń qurylysyn tolyq aıaqtaýǵa qoldaý kórsetken barsha azamatqa, qurylys jumystaryn sońyna deıin jetkizgen merdiger kompanııanyń ujymyna alǵys bildiremin», dedi aýdan ákimi Aslanbek Sarqulov.
Mektep basshysy Injýmarjan Ádilgereıqyzyna jańa nysannyń rámizdik kilti tabys etilgen soń, ardager ustaz Gúljııan Ǵarıfqyzy, Alma Orazbaevanyń týysy Rınat Iýsýpuly, mektep maqtanyshy, olımpıada júldegeri, «Altyn belgige» úmitker Álıhan Janybekov jáne oblystyq bilim basqarmasy basshysynyń orynbasary Bısenbek Nasımýllın mektep lentasyn qıyp, meımandardy ishke shaqyrdy. Is-sharada Batys Qazaqstan oblysy ákimi Narıman Tóreǵalıevtiń quttyqtaýy oqylyp, jańa mektepke óńir basshysy atynan LED ekran syıǵa tartyldy.
Jańa mekteptiń ishi zaman talabyna saı bezendirilip, tolyq jabdyqtalǵan. Mektepte ár balaǵa arnalǵan 600 shkaf ornatylǵan. Ǵımarat ishi jaryq ári jyly. Oqýshylardyń alańsyz bilim alýyna tolyq múmkindik bar.
Aýylda 2018 jyly ashylǵan Alma Orazbaevanyń bıýsti de osy kúni jańa mekteptiń aldynan oryn tapty. Eskertkishke gúl shoǵy qoıylyp, aınalasyna terek kósheti egildi.
Tarıhqa kóz salsaq, Ishki Bókeı ordasyna qaraǵan Talópke qısymynda starshyndyq mektep 1868 jyly salynyp, alǵash shákirt qabyldaǵan eken. Onyń ashylýyna sol kezdegi Qamys-Samar men Talov bólimderin basqarǵan tarıhı tulǵa Muhamed-Salyq Babajanov muryndyq bolypty. Al 1959 jyly aqpanda mektepke qoǵam qaıratkeri Alma Orazbaevanyń esimi berilgen. Sımbırskide chývash mektebin, Ordada qyzdar mektebin bitirgen, keıin úshjyldyq muǵalimder kýrsyn aıaqtaǵan Alma Dinmuhamedqyzy Jańaqazan aýylynda muǵalim bolǵan alǵashqy qazaq qyzdarynyń biri edi.
Batys Qazaqstan oblysy