Búgin L.Gýmılev atyndaǵy Eýrazııa ulttyq ýnıversıtetiniń bas ǵımaratynda Jýrnalıstıka jáne saıasattaný fakýltetiniń uıymdastyrýymen, Bas redaktorlar klýbynyń qoldaýymen fılologııa ǵylymdarynyń doktory, professor, Bilim berý isiniń úzdigi Sáýle Esembekqyzy Tapanovanyń 70 jasqa tolýyna oraı «Jýrnalıstıka men ádebıettanýdyń ózekti máseleleri jáne damý paradıgmalary» atty halyqaralyq ǵylymı-praktıkalyq konferensııasy ótti.
L.Gýmılev atyndaǵy EUÝ-diń jýrnalıstıka jáne saıasattaný fakýltetiniń dekany, professor Qaırat О́mirbaıuly moderatorlyq etken rýhanı sharany L.Gýmılev atyndaǵy EUÝ Basqarma múshesi – Akademııalyq máseleler jónindegi prorektor, ekonomıka ǵylymynyń doktory, professor Maqysh Serik Bıhanuly ýnıversıtet rektory Erlan Sydyqovtyń quttyqtaýymen ashyp, 26 myń stýdentti oqytyp otyrǵan úlken ujymnyń atynan quttyqtady. Sonymen qosa Ǵylym jáne joǵary bilim mınıstri Saıasat Nurbektiń Qurmet gramotasyn mereıtoı ıesine tabys etti.
Budan soń, mereıtoı ıesi týraly «Professordyń parasat keńistigi» atty vıdeofılm kórsetildi. Sáýle Tapanovanyń 70 jyldyq mereıtoıy qarsańynda shyǵarylǵan «Ustaz. Ǵalym. Ádisker», «Sáýleli jyldar» atty kitaptary tanystyrylyp, tusaýkeser rásimi ótti.
Munan soń, Bas redaktorlar klýbynyń vıse-prezıdenti Muratbek Toqtaǵazın Parlament Senatynyń depýtaty, Bas redaktorlar klýbynyń prezıdenti Bıbigúl Jeksenbaıdyń quttyqtaýyn oqyp berip, barlyq bas redaktorlar atynan quttyqtap, syı-sııapat jasady.
Kafedra meńgerýshisi, tarıh ǵylymdarynyń doktory, professor Tilegen Sadyquly: «Ǵylymnyń qaınar bulaqtary aımaqtardan bastalady, Jezqazǵanda pedagogıkalyq ınstıtýt ashylyp, bilim-ǵylym, mádenıet keldi, úlken bastamalardy ótkizdik. Akademık Rymǵalı Nurǵalıevtiń «áıelder beınesin senen artyq kim jazady» degen sózi áli kúnge jadymyzda tur. Qazaq áıelderiniń beınesin kórsetýde eńbegińiz zor» dep, ǵalymnyń ǵylymǵa qosqan mol eńbegi týraly atap ótti.
Aıta ketsek, Sáýle Esembekqyzynyń mereıtoıy osydan bir aı buryn týǵan jeri Jezqazǵan qalasynda bastalǵan bolatyn. Osy oraıda, Jezqazǵanda ótken respýblıkalyq ǵylymı-tájirıbelik konferensııa sátterinen shaǵyn vıdeokórinis kórsetildi.
E.Bóketov atyndaǵy Qaraǵandy memlekettik ýnıversıteti jýrnalıstıka kafedrasynyń meńgerýshisi fılologııa ǵylymdarynyń kandıdaty Janar Ramazanova, fılologııa ǵylymdarynyń doktory, professor Vera Abısheva, Baıqońyr atyndaǵy Jezqazǵan ýnıversıtetiniń qazaq tili men ádebıeti kafedrasynyń ókilderi Kámshat Omarova, Elmıra Hamıtova, Astanadaǵy S.Seıfýllın atyndaǵy agrarlyq ýnıversıtettiń ókili Tólegen Hamıtuly, elordadaǵy Ekonomıka jáne bıznes ýnıversıtetiniń ókilderi Qanaǵat Altaıbekova, Tóleýtaı Mahmetuly quttyqtaý sóz sóılep, atalǵan ýnıversıtetterdiń rektorlarynyń quttyqtaý hattaryn oqyp berdi, sonymen qosa, Ulytaý oblysy ákiminiń «Qurmet» gramotasy jáne Jezqazǵan qalasy ákiminiń «Quttyqtaý haty» tabys etildi.
Baspasóz jáne baspa isi kafedrasynyń meńgerýshisi Amangeldi Meıramuly, saıasattaný kafedrasynyń meńgerýshisi Baǵysh Ahmetqyzy, Televızııa jáne qoǵammen baılanys kafedrasynyń meńgerýshisi Serikzat Dúısenǵazy mereıtoı ıesin quttyqtap, belgili aqyndar Janat Áskerbekqyzy men Serikzat Dúısenǵazy ǵalymǵa arnaǵan óleńderin oqydy.
Aıta ketsek, «Jýrnalıstıka men ádebıettanýdyń ózekti máseleleri jáne damý paradıgmalary» atty halyqaralyq ǵylymı-praktıkalyq konferensııasysynyń materıaldary keıin jeke jınaq bolyp shyǵady.
Sáýle Esembekqyzy Tapanovanyń «Qazaq romandaryndaǵy ǵashyqtyq saryn» (2007), «Qazaq basylymdaryndaǵy áıelder beınesi» (2013) «Qazaq romandaryndaǵy áıelder beınesi» (2017) atty monografııalary jaryq kórdi. Kóptegen jınaqtardy qurastyrýshy. Úsh júzdeı ǵylymı maqalalardyń avtory. 2 maqalasy QHR, Sındıan Jastar-О́render baspasynan, 6 maqala Reseı, 2 maqala Fransııa (Parıj), 1 maqaladan Polsha, Avstrııa, Indııa, Túrkııa t.b. elderinen jaryqqa shyqty.