Senattyń Konstıtýsııalyq zańnama, sot júıesi jáne quqyq qorǵaý organdary komıtetiniń depýtattary Qarjy monıtorıngi agenttiginde kóshpeli otyrys ótkizdi. Prezıdent tapsyrmalaryn iske asyrý aıasynda ekonomıkalyq qyzmet salasyndaǵy qylmystardy budan bylaı qylmystan tys dep taný talqylaýdyń negizgi máselesi boldy.
Komıtet tóraǵasy Nurlan Beknazarov kezdesýdi asha kelip, Prezıdenttiń halyqqa Joldaýynda elimizde qolaıly kásipkerlik ahýal qalyptastyrý jáne bılik pen bıznes arasynda syndarly dıalog óristetýdiń mańyzdylyǵyn atap ótkenin eske saldy.
«Bizdiń memleket ekonomıkalyq qylmystarǵa qatysty qylmystyq saıasatty izgilendirý úderisin, sondaı-aq olardy qylmystan aryltý máselesin dáıekti túrde júrgizip keledi. Sondaı-aq, sanksııalardy jeńildetý arqyly sol qylmystarǵa aıyppul sanksııasyn qoldanýdy keńeıtý, qoǵamdyq jáne túzeý jumystaryna tartý men bas bostandyǵyn shekteý túrindegi bas bostandyǵynan aıyrýǵa balama jazalar belgileý, ákimshilik jaýapkershilik salasyna aýyrlyǵy az birqatar qylmystardy aýdarý ne qylmystyq jaýaptylyqty alyp tastaý jóninde Qylmystyq kodekske tıisti túzetýler engizildi», dedi N.Beknazarov.
Is-shara barysynda Ádilet mınıstriniń orynbasary Alma Muqanova múddeli organdardyń qylmystan aryltý múmkindigin qarastyratyn normalarǵa júrgizgen taldaýy týraly aıtty. Ol sotqa deıingi tergep-tekserýdi júrgizetin organ is júzinde az qoldanylatyn jáne sırek bolýyna baılanysty qylmystyq zańnamanyń keıbir normalaryn alyp tastaýdy usynatynyn atap ótti. Sonymen qatar otyrysqa Qarjy monıtorıngi agenttiginiń, Bas prokýratýranyń jáne «Atameken» ulttyq kásipkerler palatasynyń ókilderi qatysty.
Senator N.Beknazarov is-shara sońynda Memleket basshysynyń tapsyrmalaryn oryndaý jáne kásipkerlerdiń qorǵalý deńgeıin arttyrý maqsatynda Parlament pen múddeli memlekettik organdardyń aldynda ekonomıkalyq qyzmet salasyndaǵy birqatar qylmystyq quqyq buzýshylyqty qylmystan tys dep taný týraly Qylmystyq kodeksti odan ári jetildirýge baǵyttalǵan zańnamalyq normalardy ázirleý mindeti turǵanyn atap ótti.