Ulytaý oblysynyń ákimi Berik Ábdiǵalıuly Sátbaev qalasy halqymen kezdesti. Birneshe oblystyq basqarma basshylary baıandama jasap, óz salalary boıynsha qalada atqarylyp jatqan jumystar men ózekti máseleler týraly aıtty. Qala ákimi Shapaǵat Áýbákirdiń baıandamasynda negizinen qalanyń aldaǵy damý jospary sóz boldy.
Qalanyń áleýmettik-ekonomıkalyq damý barysy kezdesýdiń negizgi arqaýyna aınalǵanyn atap ótken oryndy. Qanysh qalasy – kenshiler qalasy. Qala turǵyndarynyń 80%-dan astamy «Qazaqmys» korporasııasynyń qurylymdarynda jumys isteıdi. Negizgi bıýdjettik túsim de «Qazaqmys» qurylymdarynan túsedi. Statıstıkaǵa súıensek, bıylǵy 10 aıdyń qorytyndysy boıynsha qalada ónerkásip óndirisiniń kólemi 75,5 mlrd teńgeni qurap, ótken jyldyń sáıkes merzimine qaraǵanda 9,4%-ǵa ósti. Al Qaladaǵy jumys istep turǵan shaǵyn jáne orta kásipkerlik nysandarynyń sany – 4 415. Bul kórsetkish ótken jyldyń tıisti merziminen 21,3%-ǵa artyq.
Negizgi kapıtalǵa salynǵan ınvestısııalar kólemi 47,3 mlrd teńgeni qurady nemese 2022 jyldyń tıisti kezeńine 23% ósimdi kórsetti. Eger tarqatyp aıtar bolsaq, «Jezqazǵansvetmet» О́B – «Qazaqmys korporasııasy» JShS fılıaly boıynsha – 39 mlrd 365 mln teńge, bıýdjettik ınvestısııalar – 2 mlrd 029 mln teńge, qalǵan uıymdar men kásiporyndar boıynsha 5 mlrd 933,1 mln teńge boldy.
Qazirgi kezde qalada jalpy quny 75,6 mlrd teńgeni quraıtyn birneshe ınvestısııalyq jobanyń pýly qalyptastyrylǵan. Solardyń biri – «Sátbaev mıneraldy jáne jemis sýlary zaýyty» JShS «Ulytaý» mıneraldy sý óndirisin jańǵyrtý jobasy aıasynda lımonadtar men shaı quıý jelisin iske qosý. Bul jobanyń jalpy quny 420,7 mln teńgeni quraıdy. Jobany iske qosý 2024 jyldyń 1-toqsanyna josparlanyp otyr.
Taǵy bir joba «Qus etin óńdeý maqsatynda soıý sehy» iske qosylǵanda jylyna 5 myń tonna qus eti óndirilmek jáne 50 turaqty jumys orny paıda bolady. Bul jobanyń paıdalanýǵa berilýine de kóp qalǵan joq. Keler jyldyń alǵashqy toqsanynda joba iske qosylady.
Kezdesý barysynda ártúrli másele sóz bolatyny belgili. Halyq tarapynan kommýnaldyq qyzmetke kóńil tolmaýshylyq, tarıfterdiń jıi kóteriletine degen qynjylys baıqaldy. Densaýlyq saqtaý salasyndaǵy túıtkilder de nazardan tys qalmady. Saıyp kelgende kóp nárse ekonomıkalyq jaǵdaıǵa baılanysty. Muny da túsiný kerek. Monoqala mártebesi bar qalanyń búgininen góri erteńi kóbirek alańdatady. Sondyqtan da qalada shaǵyn jáne orta kásipkerlikti damytý, jańa óndiris oryndaryn ashýdyń mańyzy óte zor. Bul rette qolǵa alynyp jatqan sharalar erteńge degen senimdi nyǵaıta túsedi.
Ulytaý oblysy,
Sátbaev qalasy