Ulttyq murajaıda mýzeı pedagogıkasy jáne balalar shyǵarmashylyǵy bóliminiń «Tarıhı tulǵalar» jobasy aıasynda aqyn, Alash qaıratkeri Maǵjan Jumabaevtyń 130 jyldyǵyna arnalǵan «Men jastarǵa senemin» atty poezııa keshi ótti.
Ádebı kesh oqýshylardy Maǵjannyń ómirbaıanymen, shyǵarmashylyǵymen tanystyrý, jastardyń kórkem shyǵarmalardy oqyp-úırenýge yqylasy men qyzyǵýshylyǵyn arttyrý maqsatynda uıymdastyrylǵan.
Is-sharaǵa L.N.Gýmılev atyndaǵy Eýrazııa ulttyq ýnıversıtetiniń «Topjarǵan» aqyndar klýbynyń músheleri, M.Jumabaev atyndaǵy halyqaralyq kolledjiniń stýdentteri men elordalyq mektepterdiń oqýshylary qatysty.
Jınalǵan qaýym M.Jumabaevtyń óleńderin, aqynǵa arnaǵan jalyndy jyrlaryn oqydy. Abzal Maqash bastaǵan dombyrany janyna serik etken jas aqyndar Maǵjannyń kesteli jyrlaryn tógip, arnaý oryndap berdi. Al Á.Bókeıhan atyndaǵy Bınom mektebiniń 1-synyp oqýshylary «Men jastarǵa senemin» óleńin oqyp, jınalǵan jurtshylyqty tánti etti.
Aqyndyǵymen qatar Maǵjannyń óskeleń urpaqtyń tárbıesine qosqan úlesi zor. №67 Ilııas Esenberlın atyndaǵy mektep-gımnazııanyń muǵalimi Aqsholpan Ánápııa aqynnyń «Pedagogıka» eńbegine keńinen toqtaldy. Munda tárbıe óneriniń negizgi qaǵıdattary qazaqy tanym sheńberinde túsindirilgen. Ustaz Maǵjan Jumabaevtyń bul eńbegi zaman ózgerse de, ózektiligi joǵalmaıtyn qundy dúnıe ekendigin atap ótti.
Erekshe atap ótetin jaıt, Ulttyq mýzeıde baldyrǵandardan bastap stýdentterge deıingi jas aýdıtorııaǵa arnalǵan keshendi mádenı-bilim berý baǵdarlamasy qarastyrylǵan.
Máselen, «Meniń Qazaqstanym» ortalyǵynda baldyrǵandar men oqýshylar qazaqtyń kıiz úıi, turmystyq zattary, dástúrli mýzykalyq aspaptarmen tanysady, sadaq tartyp, asyq atady. «Mýzeıdegi mektep kúni» jobasy aıasynda 5-9 synyp oqýshylary Qazaqstan tarıhy boıynsha bilimderin eksponattardy zertteý arqyly tereńdetedi. «Dana» jobasynyń aıasynda ótetin ádebı, mýzykalyq, poezııalyq keshterdiń maqsaty – stýdentterdiń shyǵarmashylyq alańyn qalyptastyrý.
Arnaıy bilim berý qajettilikteri bar balalar da nazardan tys qalmaıdy. «Qoljetimdi mýzeı» jobasy aıasynda zaǵıp jáne nashar kóretin kelýshiler taktıldi eksponattardy qolymen ustap, aýdıogıdter kómegimen qajetti aqparatpen qamtylǵan. Al «Meıirim» jobasy aıasyndaǵy «Qolóner ǵalamshary» úıirmesi erekshe bilim berý qajettilikteri bar balalardy ónerge baýlý arqyly qol motorıkasyn damytyp, áleýmettik ortaǵa beıimdeýge kómektesedi.