Sot aıyptalýshyǵa ultaralyq alaýyzdyqty qozdyrǵany úshin úkim shyǵardy, dep habarlaıdy Egemen.kz.
Astana qalasynyń sotynda Natalıa Svırıdenkoǵa qatysty úkim shyǵaryldy. Ol ultaralyq alaýyzdyqty qozdyrǵany úshin kináli dep tanylyp, tórt jylǵa bas bostandyǵynan aıyryldy.
Natalıa Svırıdenko 7 tamyzǵa qaraǵan túni Tık-tok jelisinde onlaın-translıasııa jasaǵan. Efır barysynda ol óziniń oqyrmandarynyń arasynda basqa da ult ókilderi bar ekenin bile tura, qazaqtardyń ulttyq ar-namysy men qadir-qasıetin qorlaýǵa tyrysqan.
Oǵan qosa Svırıdenko qazaqtardy maımyldarǵa teńep, kórermenderiniń biriniń balasyna ólim tilese, endi birin "naýqas" degen. Sonymen qatar ol qazaqtardy 2022 jyldaǵy qaıǵyly Qańtar oqıǵasyna jaýapty dep ataǵan.
Sondaı-aq aýzyna kelgenin aıtqan áıeldiń efır kezinde mas bolǵany belgili boldy.
– Svırıdenko Natalıa Valentınovna QR QK-niń 174-baby 1-bóliginde («Áleýmettik, ulttyq, rýlyq, násildik, taptyq nemese dinı arazdyqty qozdyrý») kózdelgen qylmystyq quqyqbuzýshylyq jasaǵany úshin kináli dep tanylsyn jáne oǵan ortasha qaýipsizdiktegi qylmystyq-atqarý júıesi mekemesinde jazasyn óteı otyryp, 4 jyl merzimge bas bostandyǵynan aıyrý túrindegi jaza taǵaıyndalsyn, – delingen Astana qalasy qylmystyq ister jónindegi aýdanaralyq sotynyń úkiminde.