Ekibastuzdyq músinshi, muǵalim, Eýrazııa dızaınerler odaǵynyń múshesi Baıan Qaınysheva G.Potanın atyndaǵy óńirlik tarıhı ólketaný mýzeıinde tuńǵysh ret jeke kórmesin ótkizdi. «О́nerimmen ushtasqan ómirim» atty kórmege sheberdiń 60-tan asa týyndysy qoıyldy.
Baıan Qurmanqyzy – on saýsaǵynan óner tamǵan sheber. Ol tek músindeý ǵana emes, toqyma, tiginshilik, kıiz basý, sándik qoldanbaly óner túrlerine den qoıǵan. Ekibastuzdaǵy Abaı men Muhtardyń, Estaı men Sultanmahmut aqyndardyń, Baıanaýylda Júsipbektiń, Ereımentaýda Úmbeteı jyraýdyń músinderin jasaǵan. Besaspap jannyń alǵashqy týyndysy – ákesiniń shaǵyn músini.
– Týyndylarymnyń ishinde eń unaıtyny – anamnyń músini. Anam men ulymnyń músinin birge jasap edim, Astanadaǵy kórmege qatysqanda kelýshilerdiń biri attaı qalap alyp ketti. Al búgingi kórmege áıgili jerlesterimiz Máshhúr Júsiptiń, Qanysh Sátbaev pen Estaıdyń músinderin, túrli janrdaǵy keskinder men sándik qoldanbaly óner týyndylaryn, júnnen, kıizden basylǵan kompozısııalardy ákelip otyrmyn. Bıýst-eskertkishterdi negizinen gıpsten, kúıdirilgen sazdan jasaımyn. Baıqaǵandaryńyzdaı, kóbine qazaq qarııalarynyń, ulttyq dástúrimizge, bolmysymyzǵa saı keskin-kelbetterdi somdaýǵa tyrysamyn, – deıdi sheber.
Bir qyzyǵy, Baıan Qurmanqyzynyń óner salasy boıynsha arnaıy mamandyǵy joq. Kezinde tek tiginshilik kásipti meńgeripti. Keıin pedagogıkalyq ýchılıshe men jergilikti ýnıversıtette bilim alǵan. Búginde kenshiler qalasyndaǵy №22 gımnazııa mektebinde kórkem eńbekten shákirt tárbıelep júrgenin jetkizdi.
Qazaqstan Sýretshiler odaǵy óńirlik fılıalynyń tóraǵasy О́serbaı Shuranov atap ótkendeı, Baıan Qurmanqyzynyń týyndylary shynaıy ómirdi beıneleıdi. Adamnyń bet-pishinin, minezin joǵary deńgeıde berý, syrtqy harızmasyn saqtap qalý – ekiniń biriniń qolynan kele bermeıtin sheberlik. Júzden asa týyndynyń avtory sońǵy ýaqytta kıiz basý, júnnen buıymdar jasaýǵa ábden mashyqtanyp alǵanyn baıqatyp otyr. Al tutastaı alǵanda, sheberdiń týyndylarynan adal mahabbattyń, syılastyq pen súıispenshiliktiń lebi esedi.
PAVLODAR