Parlament Senatynyń Tóraǵasy Máýlen Áshimbaev Shveısarııa Konfederasııasynyń Qazaqstandaǵy Tótenshe jáne О́kiletti elshisi Salman Balmen kezdesti. Suhbat barysynda taraptar eki el arasyndaǵy yntymaqtastyqty odan ári nyǵaıtý máselelerin talqylady, dep habarlaıdy Egemen.kz Parlament Senatynyń baspasóz qyzmetine silteme jasap.
Senat Spıkeri elshi Salman Baldy Qazaqstandaǵy qyzmetiniń bastalýymen quttyqtap, Shveısarııa Konfederasııasy elimizdiń Eýropadaǵy mańyzdy saıası jáne ekonomıkalyq seriktesteriniń biri ekenin atap ótti. Osyǵan oraı ol halyqaralyq uıymdar aıasynda eki eldiń parlamentaralyq baılanysyn jandandyrýdyń mańyzdylyǵyna nazar aýdardy.
«Qazaqstan Parlamenti Shveısarııamen parlamentaralyq yntymaqtastyqty damytýǵa múddeli. Mundaı baılanys ekijaqty qarym-qatynastyń mańyzdy bóligi ekeni anyq. Bizdiń Parlamenttiń eki Palatasynda da Shveısarııa Parlamentimen dostyq toptary jumys isteıdi. Olardyń áleýetin belsendi paıdalanýymyz kerek. Osy oraıda Parlament delegasııalarynyń ózara saparlaryn uıymdastyrýǵa, sondaı-aq Eýropadaǵy Qaýipsizdik jáne Yntymaqtastyq Uıymynyń Parlamenttik Assambleıasy, Parlamentaralyq Odaq sııaqty halyqaralyq uıymdar sheńberinde Shveısarııa depýtattarymen yntymaqtastyqty damytýǵa mol múmkindik bar», dedi Máýlen Áshimbaev.
Kezdesý barysynda Palata Tóraǵasy Qazaqstan men Shveısarııa arasyndaǵy dıplomatııalyq qatynastardyń ornaǵanyna 30 jyl tolǵanyn, osy ýaqyt ishinde ekijaqty yntymaqtastyq nyǵaıyp, túrli salalarda birlesken jobalar men baǵdarlamalar tabysty iske asyrylǵanyn atap ótti.
Sonymen qatar Máýlen Áshimbaev Qazaqstan Prezıdenti Qasym-Jomart Toqaevtyń bastamasymen elimizde iske asyrylyp jatqan aýqymdy saıası jańǵyrtý baǵdarlamasynyń nátıjelerine nazar aýdardy.
Senat Tóraǵasy rýhanı dıplomatııany damytý máselesine de basa mán berdi. Osy oraıda ol Shveısarııaǵa Álemdik jáne dástúrli dinder lıderleri Sezine belsendi qoldaý kórsetip, Forým maqsattaryna qol jetkizýge eleýli úlesi qosqany úshin rızashylyǵyn bildirdi.
О́z kezeginde elshi Qazaqstanda júrgizilip jatqan qoǵamdyq-saıası ózgeristerdi joǵary baǵalap, eki el arasyndaǵy yntymaqtastyqty odan ári nyǵaıtýǵa múddeli ekenin bildirdi.