Astanada rýlge mas kúıinde otyrǵan boıjetken turǵyn úıdiń aýlasynda aldymen adamdy qaǵyp, odan ári turaqtaǵy úsh kólikti soqqan, dep habarlaıdy Egemen.kz.
Oqıǵanyń saldarynan 42 jastaǵy jaıaý júrginshi alǵan jaraqatynan sol jerde kóz jumdy.
Astana qalalyq Polısııa departamentiniń baspasóz qyzmetinen jazǵandaı, «Toyota Camry» kóliginiń 20 jastaǵy júrgizýshisi ýaqytsha ustaý abaqtysyna qamaldy.
«Jol-kólik oqıǵasy faktisi boıynsha Astana qalasynyń Polısııa departamenti QR Qylmystyq kodeksiniń 345-baby 3-bóligi (Kólik quraldaryn basqaratyn tulǵalardyń abaısyzda adam ólimine ákep soqqan jol qozǵalysy nemese kólik quraldaryn paıdalaný erejelerin buzýy) boıynsha qylmystyq is qozǵady. Bul baptyń sanksııasy bes jylǵa deıingi merzimge bas bostandyǵynan aıyrý túrindegi jaýapkershilikti kózdeıdi. Tıisti saraptamalar taǵaıyndaldy», delingen málimette.