Tegeran qalasynda Qazaqstan men Iran arasyndaǵy saýda-ekonomıkalyq, ǵylymı-tehnıkalyq jáne mádenı yntymaqtastyq jónindegi úkimetaralyq komıssııanyń 19-shy otyrysy ótti, dep habarlaıdy Egemen.kz Premer-mınıstrdiń baspasóz qyzmetine silteme jasap.
Premer-mınıstrdiń orynbasary Serik Jumanǵarın men Iran aýyl sharýashylyǵy mınıstri Mohammad Alı Nıkbahttyń teń tóraǵalyǵymen ótken sharaǵa eki el mınıstrlikteri men memlekettik kásiporyndarynyń ókilderi qatysty. Úkimetaralyq komıssııa otyrysynda taraptar saýda, aýyl sharýashylyǵy, logıstıka, energetıka, densaýlyq saqtaý, bilim berý, týrızm jáne basqa da salalardaǵy memleketaralyq qatynastardyń tabysty damyp kele jatqany aıtyldy. Aldaǵy ýaqytta Qazaqstan men Iran arasyndaǵy taýar aınalymyn úsh mıllıardtyq mejege jetkizý mindeti qoıylyp otyr.
«Osy tapsyrmany oryndaýdyń alǵashqy qadamy О́zara taýar aınalymyn $3 mlrd-qa jetkizý jónindegi is-sharalar josparyna qol qoıý bolady. Qujat eksporttaýshy kásiporyndardy birneshe baǵytta qoldaýdy kózdeıdi: ózara saýda kólemin ulǵaıtý, saýda-sattyqtaǵy shekteýlerdi alyp tastaý, ekijaqty klırıng mehanızmin engizý», dedi S.Jumanǵarın.
Irannyń aýyl sharýashylyǵy mınıstri Mohammad Alı Nıkbahttyń aıtýynsha, ırandyq kásiporyndar Qazaqstanǵa balyq jáne sút ónimderi, bal, jemister men kókónister, keptirilgen jemister jáne basqa da azyq-túlik ónimderin jetkizýdi uıymdastyra alady. Sondaı-aq ırandyq tarap Qazaqstan ınvestısııasyna qyzyǵýshylyq tanytty. Tegeran Qazaqstannan kelgen ınvestorlarǵa Irannyń erkin ekonomıkalyq aımaqtarynda bıznes júrgizý úshin erekshe jaǵdaılar jasaýǵa daıyn. Kólik-logıstıkalyq yntymaqtastyqty damytý jaıy da talqylandy. S.Jumanǵarın Tegeranǵa jumys sapary barysynda aýyl sharýashylyǵy, turǵyn úı-kommýnaldyq sharýashylyq, ınvestısııa, taý-ken jáne metallýrgııa ónerkásibi, ónerkásip jáne kólik salalaryndaǵy jetekshi ırandyq kásipkerlermen kezdesti. Jıyn sońynda eki el arasyndaǵy taýar aınalymyn $3 mlrd-qa deıin jetkizý jónindegi is-sharalar josparyna qol qoıdy.