Bul kúnderi birqatar memlekette qysqy sport túrlerinen dúbirli dodalar ótip jatyr. Sol jarystarda baq synap jatqan elimiz sportshylarynyń óneri jaman emes.
Italııanyń Renon qalasynda jalaýy jelbiregen konkıden jastar arasyndaǵy Álem kýboginiń kezeńdik saıysynda Margarıta Artemeva 500 metrlik básekede aldyna jan salmady. Chempıonnyń kórsetkishi – 40.04 sekýnd. Osyǵan deıin túrli básekelerde birneshe ret jeńis tuǵyryna kóterilgen Inessa Shýmekova (40.27 sekýnd) bul joly kúmispen kúpteldi. Sonyń aldynda ǵana ol 1 000 metrlik qashyqtyqta top jarǵan edi. Qola medal norvegııalyq Vılde Baasqa buıyrdy. Nıderlandtyń Leývardeninde short-trekshiler bas qosty. Qyzǵaldaqtar elinde Dinmuhamedaldııar Tájibaı úshinshi satyǵa jaıǵasty. Alǵashqy eki oryndy Ońtústik Koreıanyń ókili Han Ben-Chan men jarys qojaıyny Bas van der Valký ıelendi.
Fınlıandııanyń Rýka qalasynda ótken frıstaılshylardyń jarysynda kanadalyq Marıon Teno bas júldeni oljalasa, aýstralııalyq Danıel Skott kúmiske qol sozdy. Al Janbota Aldabergenova qola medaldi moınynda jarqyratty.