О́ńirlerdi damytý maqsatynda elimizdiń túkpir-túkpirinen eńbek kúshin, bilikti mamandardy tartyp, otbasylarymen qonystandyrý, jumys oryndaryn usyný Abaı oblysynda da qarqyndy júrip jatyr. Jyl basynan beri «Qýatty óńirler – el damýynyń draıveri» ulttyq jobasynyń sheńberinde Abaı oblysyna 584 adam (217 otbasy) qonys aýdarǵan eken. Onyń 196-sy atajurtqa at basyn tiregen qandasymyz bolsa, 388-i ózge oblystardan qonys aýdarýshylar qatarynda.
О́tken aıdyń sońǵy onkúndiginde (20 qarasha – 1 jeltoqsan) Abaı oblysynyń Eńbek mobıldiligi ortalyǵy dırektorynyń mindetin atqarýshy Erkebulan Tursyn bastaǵan mansap ortalyqtarynyń mamandary, Jumyspen qamtý jáne áleýmettik baǵdarlamalar bóliminiń basshysy Serik Jumadilov, «Oralmandardy beıimdeý ortalyǵy» qoǵamdyq birlestiginiń basshysy Aınur Tábiltaı atalǵan ulttyq joba aıasynda Jambyl, Almaty, Jetisý oblystarynyń turǵyndarymen kezdesip qaıtqan bolatyn. Jergilikti turǵyndarmen kezdesý barysynda qonys aýdarý baǵdarlamasymen kóship kelýshilerge kórsetiletin memlekettik kómek túrleri týraly keńinen baıandaldy. Onyń aıasynda 700 turǵyn aqparattyq keńes aldy. Kezdesýge qatysqandar arasynda Abaı oblysyna qonys aýdarýǵa nıet bildirgender sany arta túskeni baıqalady.
Abaı oblysynyń Eńbek mobıldiligi ortalyǵynyń málimetine súıensek, qazirgi kúnde óńirge qonys aýdarǵan jáne qandas azamattardyń 168-i turaqty jumyspen qamtamasyz etilse, 12-si ýaqytsha jumys ornynan nápaqa taýyp otyr.
Sondaı-aq 587 adamǵa 70 AEK kóleminde kóship kelý úshin birrettik kómek kórsetilgen. Mansap ortalyǵy mamandarynyń aıtýynsha, jańa turǵylyqty jerinde erikti túrde óńiraralyq qonys aýdarýdy memlekettik qoldaý aıasynda oryn aýystyrýǵa nıettengen otbasylarǵa birrettik materıaldyq kómek beriledi. Bul otaǵasyna jáne otbasynyń árbir múshesine 70 AEK (241 500 teńge) kóleminde tólenedi.
Budan bólek, oblys ishinde qonys aýdarǵan 231 adamnyń turǵyn úı jaldaý jáne kommýnaldyq shyǵyndary ótelse, 96 adamǵa baspana satyp alýǵa ekonomıkalyq utqyrlyq sertıfıkaty berilgen. Sertıfıkat somasy bir otbasyna turǵyn úı qunynyń 50%-y, ıaǵnı 1160 AEK-ten aspaıtyn mólsherde bekitilgen. Oblys ishinde qonys aýdarýshylarǵa qatysty naqtyraq aıtar bolsaq, memlekettik turǵyn úı qorynan nemese jumys berýshilerdiń qarajaty esebinen qalalyq jerlerge qonys aýdarǵandarǵa bir adamǵa 20 AEK (69 000 teńge); al bir otbasyndaǵy jan sany 2-4 adam bolsa, 25 AEK (86 250 teńge); bes jáne odan kóp adam bolǵan jaǵdaıda 30 AEK (103 500 teńge) eseptelgen.
Al tirshiligin aýyldyq jerlerde dóńgeletkendi jón kórip, aýylǵa qonys aýdarǵandar úshin bir adamǵa 15 AEK (51 750 teńge); otbasy músheleriniń sany 2-4 adam bolǵan kezde 18 AEK (62 100 teńge), al bes jáne odan kóp bolǵan jaǵdaıda 21 AEK (72 450 teńge) kóleminde qarajat tólenedi.
Abaı oblysy