Jýyrda Glovo kompanııasynyń negizin qalaýshylardyń biri Oskar Per Qazaqstanǵa qonaqqa kelip, Astana Hub halyqaralyq tehnoparkinde elimizdiń IT qaýymdastyǵymen kezdesti. IT saladaǵy mamandarmen erkin pikir almasqan ol ózderi negizin qalaǵan iri kompanııanyń tarıhy jaıynda baıandady. Kompanııa qurarda qandaı syn-qaterge tap kelgenin jáne startap jobany bastarda eskeretin jaıttar týrasynda óz tájirıbesinen mysal keltirdi.
Glovo-nyń kýrerlerin qala kóshelerinen kórgen bolarsyzdar. Olar tapsyrys bergen adamnyń kez kelgen taýaryn dittegen jerine ýaqtyly jetkizip bere alady. Onlaın bıznes degen – osy. Taýarlar mobıldi qosymsha arqyly satylyp, jetkiziledi. Glovo alǵashynda meıramhana taǵamdaryn jetkizýmen tanylsa, búginde álemniń 25 elinde jumys isteıdi. Qosymshanyń 10 mıllıonnan asa qoldanýshysy, 61 myń kýreri bar.
Oskar Perdiń ózi AQSh-taǵy Djordjııa memlekettik tehnologııalar ınstıtýtynda oqyǵan. Tehnıkaǵa áýestigi bar ol stýdent kezinde eki onlaın kompanııa qurypty. Birinshisi – Zikkomo.com dep atalatyn Malavıdegi 30 balaǵa arnalǵan qaıyrymdylyq platformasy. Ekinshisi – jergilikti qolóner bıznesin damytýǵa arnalǵan LoveItLocal.es veb-saıty. Per 2012 jyly oqýdy bitirgen soń Týlýzada aerodınamıka ınjeneri bolyp jumys isteıdi. Demalys kúnderi San-Fransıskoǵa barǵanda «Postmates» dep atalatyn taýar jetkizýshi kýrerler jelisin basqaratyn amerıkalyq logıstıkalyq kompanııanyń konsepsııasyn kórgen. Sodan Sasha Mısho esimdi ıspandyq tehnologııalyq kásipkermen birge Glovo-ny ashqysy keledi. Árıne, olar maqsatyna kóp uzamaı-aq jetedi. Biraq kompanııany ashqannan keıingi qıyndyqtar sharýany biraz tuıyqqa tireıdi.
– Biz Glovo kompanııasyn 8 jyl buryn qurdyq. Ol kezde Barselonada birde-bir startap joq edi. Qalaı umytaıyn, ol kezde kompanııada nebári eki-aq kýrer jumys istegen edi. Al qazir bizde jumys isteıtin jas óte kóp. Sebebi ıkemdi jumys kestesi boıynsha kýrer bolý jastarǵa tıimdi, – dedi O.Per.
Taǵy bir jaǵymdy jańalyq, Glovo jetkizý qyzmetiniń TMD elderindegi kýrerleri Astana Hub-tyń bilim berý baǵdarlamalary boıynsha IT-mamandyqtarda oqyp jatyr. Kompanııa kýrerlerge arnalǵan Freelance School, Startup Academy jáne No Code School kýrstaryn qarjylandyrǵan. Osylaısha, basshylyq jumysshylaryn ınnovasııalyq bilimmen yntalandyrýdy kózdep otyr. Olardyń Glovo-nyń Astana Hub Education bilim berý baǵdarlamalaryn tańdaýy da teginnen-tegin emes dep túıdik.
Qyrǵyzstandaǵy Glovo kýreri Ázızbek Malatıpov – bir kýrstan keıin ekinshisin oqyp, bilimin shyńdap júrgen jastyń biri.
– О́zim osyǵan deıin No Code School kýrsyn oqyp bitirdim. Qazir Freelance School-da oqyp júrmin. Saıt pen mobıldi qosymsha jasaýǵa burynnan qyzyǵatynmyn. Biraq múmkindik bolmady. Keleshekte IT salany meńgerip, osy baǵytta jańa dúnıeler jasasam dep ishteı armandadym. Qazir sáýletshi-dızaıner mamandyǵy boıynsha oqyp júrmin, syzýmen aınalysamyn. Kýrs kezinde qashyqtan jumys isteý múmkindigi bar ekenin bildim, – dedi Ázızbek.
Astana Hub bilim berý baǵdarlamalary keńsesiniń dırektory Dáýlet Beımýrzınovtiń aıtýynsha, Astana Hub pen Glovo-nyń kýrerlerdi oqytý jónindegi birlesken jobasy 2 jyldan beri iske asyp keledi. Naqtyraq aıtar bolsaq, Astana Hub pen Glovo arasyndaǵy yntymaqtastyq byltyr Ortalyq Azııadaǵy eń iri Digital Bridge-2022 IT forýmynda bekigen. Sol kezde qos tarap IT-startaptardy damytý jáne qoldaý salasyndaǵy yntymaqtastyq týraly memorandýmǵa qol qoıǵan. Jyl sońyna deıin Glovo-nyń 450 qyzmetkeri IT-mamandyqtarda bilimin shyńdap, sertıfıkat alady. Búgingi kýrerler bilim berý kýrstarynan keıin IT saladaǵy tabysty mamandardyń qataryna qosylyp jatsa, munyń ózi jastarǵa úlken olja bolary anyq.