Oral qalasynda bokstan jastar arasyndaǵy el birinshiligi óz máresine jetti. Alty kúnge sozylǵan básekeler barysynda respýblıkamyzdyń barlyq aımaǵynan kelgen bylǵary qolǵap sheberleri 13 júlde jıyntyǵyn sarapqa saldy.
Jalyndy jastar arasyndaǵy jaýapty jarysqa tórt óńirdiń órenderi óte jaqsy daıyndyqpen kelgeni birden baıqaldy. Solardyń arasynan Qaraǵandy oblysynyń kóshi ilgeri boldy. Kenshiler aımaǵynyń ókilderi 2 altyn, 3 kúmis jáne 2 qolany qorjynǵa saldy. Jekelegen bylǵary qolǵap sheberlerine keler bolsaq, 52 kg salmaq dárejesiniń bas júldesin qaraǵandylyq Almas Nurlan men Rýslan Qulymbekov ózara sarapqa saldy. Bul báseke alǵashqysynyń paıdasyna sheshildi. 82 kg salmaqta Imanǵalı Nurpeıisovtiń asyǵy alshysynan tústi. Fınalda ol oraldyq Imran Dinishevten basym tústi.
Jalpy esepte Jambyl oblysy (2 altyn, 2 kúmis, 3 qola) ekinshi oryndy ıelendi. Taraz boks mektebiniń túlekteri arasynda Asqar Qýanysh (63,5 kg) pen Madııar Beksultanovqa (80 kg) teń keler eshkim tabylmady. Aqtyq synda Asqar túrkistandyq Ahmet Úsendi tize búktirse, Madııar astanalyq Shámil Sagıdoldaevqa san soqtyrdy. Úshinshi satyǵa Qyzylordanyń qyrandary (2+0+1) jaıǵasty. Syr boıy jankúıerlerin Erhan Ońtalapov (54 kg) pen Aslan Eldibaıuly (92 kg) qýantyp, bas júldeni oljalady. Tórtinshi orynǵa taban tiregen Shymkenttiń shymyr jigitteri eki altyndy enshiledi. Olar – Bek Joldasbek (60 kg) pen Sanjar-Álı Begálıev (75 kg).
Batys Qazaqstan (1+1+3), Túrkistan (1+1+1), Jetisý (1+0+0), Aqtóbe (1+0+0) oblystary men Almaty qalasy (1+0+0) ókilderiniń de aıaqalysy jaman emes. Fınalda oraldyq О́ner Seıilhan (71 kg) astanalyq Álmuhammed Ahmetovten aılasyn asyrsa, Ońtústikten kelgen Sultan Turdaly (67 kg) men taldyqorǵandyq Ádilbek Qojahan (48 kg) abaılyq Dıas Serikuly men Abaı Tóleýbekovti jeńdi. Al almatylyq Nurkeldi Jumataı (+92 kg) mańǵystaýlyq Salaýat Tilekbaıdy aıqyn basymdyqpen utty.
Sondaı-aq Astana qalasy (0+2+3), Abaı (0+2+3), Almaty (0+1+3), Mańǵystaý (0+1+0), Pavlodar (0+0+2), Aqmola (0+0+1), Atyraý (0+0+1), Qostanaı (0+0+1) jáne Shyǵys Qazaqstan (0+0+1) men Soltústik Qazaqstan (0+0+1) oblystarynyń boksshylary da úıine quralaqan oralǵan joq. Bir aıta keterligi, Qazaqstannyń barlyq aımaǵynan kelgen jalyndy jastardyń jarysynda Ulytaý óńiriniń órenderine ǵana jeńis tuǵyryna kóterilý baqyty buıyrmady.